ينتەرنەتتە الاياقتاردى قالاي انىقتاۋعا بولادى؟
پوليتسەيلەردىڭ ايتۋىنشا، تانىمال سەرۆيستەر، الەۋمەتتىك جەلىلەر، جارناما سايتتارى قاسكۇنەمدەردىڭ قىزىقتىراتىن ورىندارى. الاياقتار اقشا جىمقىرۋدىڭ ءتۇرلى جولدارىن بىلەدى. الايدا، ولار قانشا ساق بولعانىمەن، ولاردى انىقتاۋعا بولادى.
«قازىر كوپكە تانىمال جانە الاياقتىقتىڭ ەڭ قاۋىپتى ءتۇرى: كولىك نەمەسە پاتەر ساتۋ تۋرالى «ءتيىمدى ۇسىنىس». ادامدار ونى شەتەلدە جۇرگەن «پاتەر يەسىنەن» الادى. الاياقتار ساتىپ الۋشىنىڭ تولەم قابىلەتىن راستاۋىن سۇرايدى. ولار الدىن الا تولەم سۇرامايدى، تەك اقشانى كەز كەلگەن سەنىمدى تۇلعاعا - تۋىسىنا جىبەرىپ، تولەم تۋرالى تۇبىرتەكتىڭ سۋرەتىن ءتۇسىرۋدى وتىنەدى»، - دەدى كريمينالدىق پوليتسيا باسقارماسىنىڭ باستىعى پەتر كليموۆ.
ونىڭ ايتۋىنشا، مۇنداي تۇبىرتەكتى ەشكىمگە كورسەتۋگە بولمايدى. سەبەبى، وندا شوت تۋرالى اقپارات بار. قاسكۇنەم سونى پايدالانىپ، ونداعى اقشانى وزىنە اۋدارىپ الادى.
«ساتۋشى» ءۇيدىڭ قۇجاتتارىنىڭ سۋرەتىن جىبەرسە دە، اسىعىس شەشىم قابىلداپ، الدىن الا تولەم جاساماۋ كەرەك. ويتكەنى، بۇل قۇجاتتار باسقا ادامدارعا تيەسىلى»، - دەپ اتاپ ءوتتى پ. كليموۆ.
الاياقتىقتىڭ تاعى ءبىر جولى الەۋمەتتىك جەلىلەردە تانىلعان. قاسكۇنەمدەر ينتەرنەتتى باقىلاپ، بەلسەندى ادامدى ىزدەيدى جانە ونىڭ تۋىسى نەمەسە تانىسىنىڭ ءدال كوشىرمەسىن جاسايدى.
«وسى پاراقشامەن الاياق قارجىلاي كومەك سۇرايدى. ادەتتە، نەسيە وتەۋ ءۇشىن. كوپتەگەن ادامدار، اسىرەسە جاستار، ينتەرنەت ارقىلى حات الماسىپ، تانىسىنىڭ وزىنە حابارلاسپاس بۇرىن اقشانى اۋدارىپ جىبەرەدى»، - دەپ ءتۇسىندىردى پ. كليموۆ.
كوپتەگەن سولتۇستىك قازاقستاندىقتار ينتەرنەت-الاياقتىقتىڭ قۇربانى بولىپ وتىر. وتكەن جىلى ءتارتىپ ساقشىلارى ينتەرنەت ارقىلى الاياقتىق جاساۋ تۋرالى 85 جاعداي تىركەگەن.
