شىمكەنت اكىمدىگى جابىق كابينەتتەر مەن ەسىك الدىنداعى كۇزەتتەن باس تارتتى
شىمكەنت قالاسى اكىمىنىڭ ورىنباسارى دانات جۋميننىڭ ايتۋىنشا، بۇگىن شاھار باسشىسى عابيدوللا ءابدىراحىموۆ كاسىپكەرلەرمەن كەزدەسۋ وتكىزگەن. وندا اكىمدىكتىڭ بەس باسقارماسىندا پيلوتتىق رەجىمدە مەنەدجمەنت امالىن وزگەرتۋدى تاپسىردى.
«بۇل نەنى بىلدىرەدى؟ بىرىنشىدەن، قالا اكىمىنىڭ ورىنباسارى، ياعني - مەن جانە بەس باسقارما كابينەتتىك جۇيەدەن الشاقتاپ، اشىق كەڭسەلىك كەڭىستىككە (open space) وتەمىز. بۇدان بىلاي، ءبىر- بىرىمىزگە جاقىن ورنالاسا وتىرىپ جۇمىس ىستەيمىز. ءبىزدىڭ ارامىزدا قابىرعالار مەن قابىلداۋ بولىمدەرى، حاتشىلار مەن كومەكشىلەر بولمايدى. باسشىلاردىڭ كابينەتتەرى اينەكتەن تۇراتىن بولادى»، - دەدى دانات جۋمين فەيسبۋكتە.
ونىڭ جازۋىنشا، الداعى ۋاقىتتا اشىق ەسىك ساياساتى جۇزەگە اسىرىلادى. 6 حاتشىنىڭ ورنىنا ءبىرىڭعاي رەتسەپتسيا بولادى.
«ەكىنشىدەن، ءبىز حالىققا جانە ونىڭ قاجەتتىلىگىنە جاقىنداي تۇسەمىز. ەسىك الدىن پوليتسيا قىزمەتكەرلەرى كۇزەتپەيتىن بولادى. مەيلى كاسىپكەر نەمەسە ينۆەستور بولسىن، قاراپايىم ازامات بولسىن ەشقانداي تەكسەرۋسىز ازاماتتاردى قابىلدايتىن بولامىز»، - دەيدى ول.
قالا اكىمى ورىنباسارىنىڭ سوزىنە سەنسەك، «اشىق» كەڭسەدە بارلىق مەملەكەتتىك ورگاندار مەن ۇيىمداردىڭ وكىلدەرى جينالادى.
«ۇشىنشىدەن، «پيلوتتىق» باسقارمالاردا زامانعا ساي مەنەدجمەنت تاجىريبەسىن قولدانامىز. ەڭ ءبىرىنشى كەزەكتە، وسى تاجىريبە ارقىلى ءبىرقاتار ماسەلەگە نازار اۋدارساق دەيمىز. بىرىنشىدەن، زامانعا ساي امال- ادىستەر جەرگىلىكتى اتقارۋشى ورگاندا قانشالىقتى ءتيىمدى بولادى؟ مەملەكەتتىك سەكتورعا الەمنىڭ ۇزدىك تاجىريبەلەرى ءسىڭىسىپ كەتە الا ما؟ وسى سۇراقتارعا جاۋاپ ىزدەيمىز»، - دەيدى دانات جۋمين.
ەكسپەريمەنت ءساۋىر ايىندا باستالىپ، جىل سوڭىندا اياقتالادى.
«كەيىن قورىتىندىسىن شىعارىپ، حالىققا مىندەتتى تۇردە حابارلايتىن بولامىز»، - دەپ ءتۇيدى ول.
اۆتور: ايان بەكەن ۇلى
