شىمكەنت اكىمى كاسىپكەرلەردى بىرلەسىپ جۇمىس ىستەۋگە شاقىردى
جيىندا قالا باسشىسى شاعىن جانە ورتا بيزنەس وكىلدەرىن جەڭىل جانە جيھاز ونەركاسىبىن، قۇرىلىس يندۋسترياسىن دامىتۋدا بىرلەسە جۇمىس ىستەۋگە ۇندەدى.
«ەلباسى ءوز جولداۋىندا «قاراپايىم زاتتار ەكونوميكاسىن» دامىتۋ مىندەتىن قويعان بولاتىن. ول نەگىزىنەن شاعىن جانە ورتا كاسىپورىندارعا تيەسىلى. بۇگىندە شىمكەنتتە شاعىن جانە ورتا كاسىپكەرلىكتىڭ جالپى وڭىرلىك ونىمدەگى ۇلەسى 25 پايىزدى قۇرايدى. دەگەنمەن بۇل ءالى دە از. سوندىقتان كاسىپكەرلەردى وسى ۇلەستى ارتتىرۋعا، دامىتۋعا شاقىرامىن. وعان قالامىزدىڭ ادامي جانە ماتەريالدىق-رەسۋرستارى جەتكىلىكتى. كۇندەلىكتى تۇتىنىلاتىن زاتتاردى ءوندىرۋ ناتيجەسىندە ءبىز ازاماتتاردى جۇمىسپەن قامتيمىز جانە يمپورتتى ازايتامىز»، - دەدى قالا اكىمى.
سونداي-اق، كەزدەسۋدە اتالعان باعىت بويىنشا قابىلدانعان جول كارتالارى مەن اتقارىلاتىن ءىس-شارالار بويىنشا قالا اكىمىنىڭ ورىنباسارى دانات جۋمين، الەۋەتتى جوبالاردى قارجىلاندىرۋ جانە ولاردى سۋبسيديالاۋ مەحانيزمدەرىن ءتۇسىندىرۋ بويىنشا «دامۋ قورى» ا ق شىمكەنت قالاسى فيليالىنىڭ ديرەكتورى جامبىل قالداروۆ بايانداما جاسادى.
ايتا كەتەيىك، قالادا جەڭىل جانە جيھاز ونەركاسىبىنىڭ، قۇرىلىس ماتەريالدارى ءوندىرىسىنىڭ جول كارتاسى ازىرلەنگەن. ونىڭ اياسىندا 76 گەكتار جەر تەلىمىنە «جۇلدىز» ينستۋريالدى ايماعىنىڭ قۇرىلىسى جوسپارلانۋدا. سونداي-اق، جەڭىل ونەركاسىپ سالاسىن دامىتۋ ماقساتىندا «وڭتۇستىك» ارنايى ەكونوميكالىق ايماعىنىڭ اۋماعىن 200 گەكتاردان 500 گەكتارعا دەيىن كەڭەيتۋ جوسپارلانۋدا. ناتيجەسىندە 30 وندىرىستىك كاسىپورىن، 3 مىڭنان استام جاڭا جۇمىس ورىندارىن اشۋعا مۇمكىندىك بار.
مەملەكەت باسشىسىنىڭ تاپسىرماسىن ورىنداۋ اياسىندا قالادا وڭدەۋ ونەركاسىبىندەگى ءوسۋ قارقىنىنىڭ ەسەبىنەن ءارتاراپتاندىرۋدى ودان ءارى دامىتىپ، مىڭداعان ونىمدىلىگى جوعارى تۇراقتى جۇمىس ورنىن قۇرۋ كوزدەلۋدە.
