كومەككە مۇقتاج وتباسىلاردى انىقتايتىن تەتىك ەنگىزىلەدى - بەردىبەك ساپاربايەۆ
بۇل تۋرالى ۇكىمەتتە وتكەن باسپا ءسوز ءماسليحاتىندا ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ ايتتى، دەپ حابارلايدى قازاقپارات ءتىلشىسى.
كومەككە مۇقتاج وتباسىلاردى قولداۋعا ەكپىن قويىلاتىنىنا توقتالعان مينيستر، «ول ءۇشىن جەرگىلىكتى اتقارۋشى بيلىكپەن جۇمىس ىستەپ جاتىرمىز، ءبىز ءار وتباسىعا جەكە الەۋمەتتىك كارتانى ازىرلەمەكپىز. بۇل تۇرعىدا وتباسى مۇشەلەرىنىڭ جۇمىسپەن قامتىلۋى، ولاردىڭ تابىس دەڭگەيى، وتباسىداعى پروبلەمالار قامتىلادى. وسى كارتانىڭ نەگىزىندە قولداۋ كورسەتۋ ءۇشىن كومەككە ەڭ مۇقتاج دەگەن وتباسىلاردى، ازاماتتاردى انىقتايمىز»، - دەدى مينيستر.
سونىمەن قاتار، ب. ساپاربايەۆ مەملەكەت باسشىسى بيۋروكراتيانى تومەندەتۋگە قاتىستى تاپسىرما بەرگەنىن ەسكە سالدى
«وتباسىلار اتاۋلى الەۋمەتتىك كومەكتى الۋ ءۇشىن ءبىر بۋما قاعاز جينايدى، سونداي-اق ارلى-بەرلى مەكەمەلەر اراسىندا جۇرەدى. سونى ازايتۋ ءۇشىن قازىر بىزدە «ە-حالىق» اقپاراتتىق جۇيەسى بار، سول ارقىلى ءتيىستى جۇمىستار ىسكە اسىرىلادى»، - دەدى ول.
وسى ورايدا، ول جۇمىسپەن قامتۋ ورتالىقتارى، اۋىلدار مەن اۋدانداردىڭ، قالالاردىڭ اكىمدىكتەرى قاجەتتى قادامداردى اتقاراتىنىن جەتكىزدى.
«ەگەر تۇرعىنداردىڭ قۇجاتتارى جەتكىلىكسىز بولسا، سول قۇجاتتاردى بەرەتىن مەملەكەتتىك ورگانداردان قاجەتتى مالىمەتتەردى الىپ، ازاماتتارعا ءتيىستى كومەكتى تاعايىندايتىن بولادى»، - دەدى ب. ساپاربايەۆ.
