الەۋمەتتىك جاردەماقى جاعدايى ەڭ تومەن وتباسىلارعا عانا بەرىلەدى - ءابدىقالىقوۆا
بۇل تۋرالى بۇگىن ۇكىمەت ۇيىندەگى باسپا ءسوز ءماسليحاتىندا ق ر پرەمەر-ءمينيسترىنىڭ ورىنباسارى گۇلشارا ءابدىقالىقوۆا ايتتى، دەپ حابارلايدى قازاقپارات ءتىلشىسى.
«اتاۋلى الەۋمەتتىك كومەك ونى ەڭ قاجەت ەتەتىن، ەڭ تومەن جاعدايلى ازاماتتارعا، وتباسىلارعا بەرىلەتىن بولادى. ەلىمىزدە 4 ميلليوننان استام وتباسى بار. ءار وتباسىنىڭ جاعدايى ءارتۇرلى. سوندىقتان، الدىن الا بەرىلگەن ەسەپ بويىنشا، ول ەلباسى سوزىندە دە ايتىلدى، 830 مىڭ تۇرعىنعا كومەك جاردەماقى رەتىندە بەرىلەدى»، - دەدى ول.
ۆيتسە-پرەمەردىڭ ايتۋىنشا، قازىرگى ۋاقىتتا مەملەكەتتىك ورگانعا ارىزدانىپ، كومەك سۇراپ جاتقان باسقا دا وتباسىلاردىڭ لەگى قالىڭ.
«ول وتباسىلار جەكە-جەكە قارالاتىن بولادى. ءبىرىنشى ورىندا جۇمىسپەن قامتۋ ماسەلەسى قويىلادى. جۇمىسىن باستاۋى نەمەسە ارى قاراي جالعاستىرۋى ءۇشىن ءارتۇرلى دەڭگەيدە نەسيەلەر بەرۋ ماسەلەسى قارالادى. جاستارعا گرانتتار بەرۋ، كوپبالالى انالارعا ۇيدە جۇمىس جاساۋ ءۇشىن جاعداي جاساۋ ماسەلەسىن كەڭ پايدالانۋىمىز كەرەك. بۇل ءۇشىن جۇمىستار اتقارىلادى»، - دەدى ول.
سونىمەن قاتار ۇكىمەت باسشىسىنىڭ ورىنباسارى بۇل باعىتتا ب ا ق وكىلدەرىمەن تىعىز جۇمىس ىستەۋگە دايىن ەكەندىگىن جەتكىزدى.
«ءوزىم دە سىزدەرگە قاي كەزدە دە اشىق جۇمىس ىستەۋگە ۋادە بەرەمىن. بارلىعىمىز بىرىگىپ، اسىرەسە، مۇقتاج جاندارعا، از قامتىلعان وتباسىلارعا كومەكتەسۋىمىز كەرەك»، - دەدى گۇلشارا ءابدىقالىقوۆا.
