بۇرىنعى ءبىلىم جانە عىلىم ءمينيسترى ساعاديەۆ الداعى جوسپارلارى جايىندا ايتتى
«ءبىرىنشى ءارى باستىسى، مەن مەملەكەت باسشىسىنا ماعان سەنىم ارتقانىنا العىس ايتقىم كەلەدى. بۇل تاڭعالارلىق ءۇش جىل بولدى. كوپتەگەن ىستەر اتقارىلدى، جاقسى جۇمىس ىستەدىك. تاياۋدا ماقالا وقىدىم: نە ىستەلگەنى جانە نە ىستەلمەگەنى تۋرالى ناقتى باعا بەرىلگەن. بىرگە جۇمىس ىستەگەن ادامدارعا، وسى ءۇش جىل بويى بىزگە كومەكتەسكەن ادامدارعا، ۇكىمەتتە جانە ءماجىلىس پەن سەناتتاعى ارىپتەستەرگە تۇسىنىستىكپەن قاراپ، قولداعانى ءۇشىن العىس ايتقىم كەلەدى. ءبىلىم بەرۋدىڭ بولاشاعى، ەلدىڭ قانداي بولاتىنىن كورسەتەدى»، - دەدى ەرلان ساعاديەۆ Tengrinews.kz تىلشىسىنە بەرگەن سۇحباتىندا.
بۇرىنعى مينيستر ەستە قالارلىق ءسات رەتىندە 1 -ماۋسىمدا ەلىمىزدە وتەتىن بالالار وركەسترىنىڭ شەرۋىن اتاپ ءوتتى.
«اتقارىلعان جۇمىستىڭ ىشىندە بالالار شەرۋىن ماقتان تۇتامىن. بىلتىردىڭ وزىندە وتە ادەمى جانە قىزىقتى شەرۋلەر بولدى، ولار ءبىزدىڭ رۋحتى كوتەرىپ، بىرىكتىرىپ، بالالارىمىزدى ماقتان تۇتۋعا مەدەۋ بولادى»، - دەدى ول.
ەكس-مينيستر بالالار وركەسترى مەن انسامبلدەر شەرۋى دامي بەرەدى دەپ ۇمىتتەنەدى. ەرلان ساعاديەۆ جاڭا ءبىلىم جانە عىلىم ءمينيسترى كۇلاش ءشامشيدينوۆانى ءبىلىمدى ءارى تاجىريبەلى مامان دەپ سانايدى.
«مەنىڭ ويىمشا، ءبىلىم بەرۋ سالاسىندا ول مەنەن مىقتى تۇسىنەدى دەپ ويلايمىن. بۇگىندە ءبىزدىڭ مەكتەپ جۇيەسىنىڭ ءپروتوتيپى سانالاتىن نازاربايەۆ زياتكەرلىك مەكتەپتەرىنىڭ باستاۋىندا تۇرعان تۇلعا. ەگەر قاجەت بولسا، مەن ءاردايىم كومەكتەسۋگە دايىنمىن، ءبىراق ب ع م كومانداسى قازىر جۇمىس ىستەۋگە قابىلەتتى، پروگرەسسيۆ، ءوز ۇستانىمدارىمىزدى قورعاي الاتىن ۇيىم دەپ ايتا الامىن»، - دەدى ەرلان ساعاديەۆ.
«مەن كەلەسى جىلعا دەيىن ءوز ىسىممەن اينالىسۋدى جوسپارلاپ وتىرمىن. 2020 -جىلدىڭ قاڭتارىندا مەن اياقتاماعان گارۆاردتىڭ(گارۆارد ا ق ش-تاعى تانىمال جوعارى وقۋ ورىندارىنىڭ ءبىرى - رەد.) وقۋ باعدارلاماسى باستالادى. وسى ۋاقىتقا دەيىن ءۇي شارۋاشىلىعىن رەتكە كەلتىرۋدى، مەكتەپتە وقيتىن بالالارمەن اينالىسۋدى جوسپارلاپ وتىرمىن. ادەتتەگى قالىپتى جوسپارلار»، - دەدى بۇرىنعى ءبىلىم جانە عىلىم ءمينيسترى.
