تۇركىستان قالاسىنىڭ قۇرىلىسى مەن ساۋلەتى ءۇش باعىتتا جۇرگىزىلەتىن بولادى
جيىندا تۇركىستان قالاسىنىڭ اكىمى الىپبەك وسەربايەۆ شاھارداعى قۇرىلىس جۇمىستارىمەن تانىستىردى، دەپ حابارلايدى قازاقپارات ءتىلشىسى.
شاھار باسشىسىنىڭ ايتۋىنشا، قالانىڭ قازىرگى تاڭداعى جەر اۋماعى 19,6 مىڭ گەكتاردى قۇرايدى. ال، حالىق سانى 165 مىڭ ادامعا جەتكەن. باس جوسپارعا سايكەس قالا قۇرىلىسى مەن ساۋلەتى ءۇش باعىتتا جۇرگىزىلەتىن بولادى. الدىمەن قوجا احمەت ياساۋي كەسەنەسىنىڭ ماڭىنداعى «تاريحي ايماقتى» قايتا جاڭعىرتۋ بولسا، ەكىنشى «رۋحاني مادەني ورتالىقتى» دامىتۋ. ءۇشىنشى، 750 گەكتاردى قۇرايتىن اكىمشىلىك-ىسكەرلىك ورتالىعىن سالۋ.
سونداي-اق، شاھار باسشىسى مەملەكەت مۇقتاجدىعى ءۇشىن الىنىپ جاتقان جەر تەلىمدەرى مەن قالانىڭ ينفراقۇرىلىم، جىلۋ، گاز، اۋىز سۋ جۇيەسىنىڭ جايىنا توقتالدى. جيىندا وبلىستىق قۇرىلىس باسقارماسىنىڭ باسشىسى توقتار ۇسىپالييەۆ تۇركىستان قالاسىنداعى قۇرىلىس جۇمىستارىنىڭ جايىن باياندادى. ونىڭ ايتۋىنشا، ەلباسىنىڭ تۇركىستان قالاسىن دامىتۋ تۋرالى تاپسىرماسىنا سايكەس 29 نىساننىڭ قۇرىلىسى وڭىرلەر، ۇلتتىق كومپانيالار جانە بيزنەس وكىلدەرىنە بەكىتىلىپ وتىر.
سونداي-اق باس قوسۋدا تۇركىستان وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى بەكزات تىلەگەنوۆ وبلىس ورتالىعىنداعى جول قۇرىلىسىمەن تانىستىردى. جوسپار بويىنشا اعىمداعى جىلى 974,2 شاقىرىم جول مەن كوشەلەر قۇرىلىس-جوندەۋ جۇمىستارىمەن قامتىلادى دەپ كۇتىلۋدە. ونىڭ بيىل 653,2 شاقىرىمى پايدالانۋعا بەرىلەتىن بولادى.
تۇركىستان قالاسىنىڭ جاي-كۇيى جايلى باياندامالاردى تىڭداعان وبلىس باسشىسى شاھارداعى تازالىق، كارىز جانە سۋ جۇيەلەرى مەن جول ساپاسىن سىنعا الىپ، ماسەلەنى تەزدەتىپ شەشۋدى تاپسىردى.
