عابيت مۇسىرەپوۆتىڭ ايەل، سۇلۋلىق تۋرالى ناقىل سوزدەرى
قازاق قىزى مەن ايەلىن، انا بەينەسىن كەرەمەت كوركەمدەي بىلگەن، كوركەم سوزىمەن سۋرەت سالعان جازۋشىنىڭ سۇلۋلىق، ايەل، انا، قىز تاقىرىبىنداعى عيبراتتى سوزدەرىن نازارلارىڭىزعا ۇسىنامىز.
1. ايەل اسقاقتاسا - جىلايدى، ەركەك اسقاقتاسا - قۇلايدى.
2. ايەلدىڭ ەستىلىگى جەڭسە - سۇلۋلىعى دا ارتا تۇسەدى.
3. ايەلدىڭ اقىلى - كوركىندە، ەركەكتىڭ كوركى - اقىلىندا.
4. ايەل شىنىمەن جىلاپ السا، اجارلانىپ كەتەدى.
5. ايەل بىتكەننىڭ ءبارى دە وزدەرىنەن سۇلۋىراق كورىنگەن ايەلگە جاۋ كەلەدى.
6. قازاق ايەلىن «جان جولداسىم» دەيدى. بۇل ۇلكەن ءسوز عوي. جانى مەن جانى ۇندەس، ويى، ارمانى ۇيلەس، ەگىز ادامبىز دەگەنى عوي.
7. جاپون قىزىندا ايقاي سالۋ ادەتى جوق.
8. پاتشالار ولەر، باسقالار ولەر - سۇلۋلىق ولمەس، مەيىرىم ولمەس، ادەپ ولمەس.
9. ايەل اشۋلانسا - جەڭىلەدى، ەركەلەسە - جەڭەدى.
10. جەرجۇزىندە قازاق ايەلدەرىنەن باسقا ءبىر ايەل قۇدايىن قارعاي المايدى.
11. ماسكۇنەم ۇيىنەن وتىرىك ايتىپ كەتەدى، وتىرىك ايتىپ كەلەدى. ونىڭ وتىرىگىن وڭدەيمىن دەپ بالا الدىندا شەشە وتىرىكشى بولادى.
12. انا سۇلۋلىعى جۇزىندەگى مەيىرىمىنەن كورىنەدى.
13. ايەلدەر - كونە گرەك يدەالىنا الدەقاشان جەتتى، ەركەكتەر - جوق.
14. كوركەم ءجۇزدىڭ جۇدەگەنى دە، وڭسىزدەنگەنى دە وڭاي كوزگە تۇسەدى.
15. ايەلىڭ سەرىگىم دەۋگە جاراماسا، تەك قانا بالالارىڭ بولعاندىقتان جاردىڭ ورنىندا بولعىسى كەلسە - بۇدان ارتىق قاسىرەت قايسى.
16. كەيدە سۇلۋلىق پەن ەرلىكتى سالىستىرىپ قاراساڭ - جەڭىس سۇلۋلىق جاعىندا كەتەدى.
17. دۇنيەدە ايەلدىڭ كوزىنەن ارتىق قىزىقتىرا الاتىن، ايەلدىڭ كوزىنەن ارتىق سيقىرلاپ تارتىپ كەتە الاتىن كۇش جوق قوي دەيمىن. بايلىق، باق، مانساپ، ءتىپتى قوعامدىق دارەجە دەگەندەردىڭ بىردە- بىرىندە ونداي كۇش جوق. ءبارى بىرگە قوساقتالىپ كەلىپ موينىما اسىلا كەتسە، مەن ءبارىن سىلكىپ تاستاپ، وقتاي قادالعان ايەل كوزىنە قاراي جۇرە بەرەر ەدىم.
18. كىر جۋىپ جاتقان ايەلدى رەمارك سونشا ايقىن كورسەتكەندىكتەن، مۇرنىما جۋىپ جاتقان كىردىڭ ءيىسى كەلدى.
19. قازاق قىزى ۇزاتىلعانشا نەگىزىندە ەكى- اق ءتۇرلى جۇمىس ىستەيدى: كولدەن سۋ اكەلەدى، شاي قۇيادى. جۇمىستىڭ باسقا تۇرىنە قايىن ەنەنىڭ قولىندا جاتتىعادى.
20. مەنىڭ دجاكوندام - ۇلپان.
21. قازاق ايەلى ازعانا جاردەم بەرگەندى ۇمىتپايدى - تەزىرەك ەسەلەپ قايىرۋعا تىرىسادى.
22. ايەل قىرىققا كەلگەنشە ءوڭىن بەرمەسە - قاسيەت، ەركەك قىرىققا كەلگەنشە ەسى كىرمەسە - قاسىرەت.
23. ءبىز ايەلدى ايەل سىڭايىنان تانىعان ەلمىز.
Massaget.kz
