قايرات نۇرتاس، سەرىك يبراگيموۆ، اسىلحان تولەپوۆ قازاق كۇرەسىنەن جارىسادى
جيىرماعا جۋىق پالۋان چەمپيوندىق بەلدىكتى ساراپقا سالادى. ولاردىڭ ىشىندە بىردە ءبىر كاسىپقوي سپورتشى جوق. ءبىراق ولاردى بۇكىل قازاقستان حالقى تانيدى - تاتاميگە تانىمال ارتيستەر مەن مۋزىكانتتار شىعادى.
انشىلەر، ايتىسكەرلەر، اكتەرلەر، ك ت ا- عا قاتىسۋشىلار ۇلتتىق سپورت تۇرىنەن شەبەرلىك بايقاسادى. قايرات نۇرتاس، اباي ايازبايەۆ، سەرىك يبراگيموۆ، مەيىرجان تورەبايەۆ، امانگەلدى وتەشوۆ، اسىلحان تولەپوۆ، ارتۋر تولەپوۆ، ايان وتەپبەرگەن، نۇرلان مۇسايەۆ، ەركەبۇلان دايىروۆ، الىبەك سەرعاليەۆ، نۇربولات ابدۋللين، ارداك بايعابىل، عالىم ماحامبەتوۆ، اقبولات وتەباي، سىرىمبەت بيبوسىنوۆ، حاميت ەردەحان جانە باسقالارى بوز كىلەمدە بەلدەسەدى.
جارىستىڭ باستى ماقساتى - ۇلتتىق سپورت تۇرلەرىن، اسىرەسە قازاق كۇرەسىن دامىتۋ جانە دارىپتەۋ، سونداي- اق جاستاردى سالاۋاتتى ءومىر سالتىن ۇستانۋعا باۋلۋ. ءتۋرنيردى ۇيىمداستىرۋعا استانا قالاسىنىڭ مادەنيەت جانە سپورت باسقارماسى، قازاق كۇرەسىنەن قازاقستان فەدەراتسياسى، «حابار» تەلەارناسى جانە «ايتىس- اسىل مۇرا» قوعامدىق قورى مۇرىندىق بولدى.
ەرەجەگە سايكەس، ءدۇبىرلى دوداعا 16-36 جاس ارالىعىنداعى شىعارماشىلىق مامان وكىلدەرى قاتىسا الادى.
اقپان ايىنىڭ ورتاسىندا قاتىسۋعا نيەت بىلدىرگەن پالۋاندار الماتىدا وقۋ- جاتتىعۋ جيىنىنان ءوتتى. سالماق ولشەۋ سالتاناتى 19 - ناۋرىزدا «داۋلەت» سپورت كەشەنىندە وتەدى.
