ءۇندىستانداعى ديپلوماتتار ەلگە جەتە الماي قالعان قازاقستاندىقتارعا كومەكتەستى
«ءۇندىستان مەن پاكىستاننىڭ اراسىنداعى اسكەري-ساياسي جاعدايدىڭ كۇردەلەنۋىنە بايلانىستى رەيستەرى اۋىستىرىلعان نەمەسە مۇلدە ورىندالماعان ءارتۇرلى اۋە كومپانيالارىنىڭ جولاۋشىلارى مەن ءبىزدىڭ ازاماتتار قيىن جاعدايعا تاپ بولدى. 27- اقپان كۇنى پاكىستاننىڭ اۋە كەڭىستىگى جابىلىپ قالىپ، بۇل جاعداي قازاقستاندىق اۋە تاسىمالداۋشى - «ەير استانا» كومپانياسىنىڭ جۇمىسىنا ەداۋىر اسەر ەتتى. اتاپ ايتقاندا، 65 قازاقستاندىق ازامات بەلگىلەنگەن ۋاقىتتا ەلىمىزگە ورالا المادى. ءۇندىستانداعى ق ر ەلشىلىگىنىڭ كۇش سالۋىمەن جانە اۋە كومپانياسىنىڭ ارالاسۋىمەن ولاردىڭ اۋە بيلەتتەرى باسقا ۋاقىتقا جانە باسقا اۋە جەلىسىنە قايتا بروندالدى»، - دەلىنگەن قازاقستان رەسپۋبليكاسىنىڭ ءۇندىستانداعى ەلشىلىگىنىڭ فەيسبۋكتەگى پاراقشاسىندا.
ەلشىلىكتىڭ حابارلاۋىنشا، ءبىزدىڭ 44 وتانداسىمىز ەلشىلىككە جەتكىزىلىپ، ولار تۋعان-تۋىستارىمەن بايلانىس ورناتىپ، تاماقپەن جانە قوناق ۇيمەن قامتىلعان.
«تۋىنداعان كۇردەلى جاعدايعا قاراماستان، كوتەرىڭكى كوڭىل-كۇيمەن بىرلىك تانىتا بىلگەن ازاماتتارىمىزدىڭ سابىر ساقتاعانىنا ەرەكشە العىس بىلدىرەمىز. ديپلوماتتار وتانداستارىمەن ءتىل تابىسىپ، ءبىر-ءبىرىن جاقسى تانىپ قالدى. ءبىز وتانداستارىمىزعا باقىت پەن ساتتىلىك تىلەيمىز»، - دەپ جازادى ەلشىلىكتەن.
ەسكە سالا كەتسەك، وسىدان 5 كۇن بۇرىن پاكىستاننىڭ اۋە كەڭىستىگىن جابۋىنا بايلانىستى قازاقستان مەن ءۇندىستان اراسىنداعى رەيستەر توقتاپ قالعان بولاتىن. سونىمەن بىرگە، دەليدەن الماتىعا ورىندالۋى ءتيىس رەيس شەگەرىلگەن ەدى.
ارادا كوپ وتپەي ق ر س ءى م ءۇندىستان مەن پاكىستان اراسىنداعى اسكەري-ساياسي جاعدايدىڭ شيەلەنىسۋىنە بايلانىستى مالىمدەمە جاساپ، ەكى ەل اراسىنداعى اشىق ديالوگ داعدارىستان شىعۋدىڭ جالعىز قولايلى جولى ەكەنىن جاريا ەتكەن.
تۋىنداعان احۋالدى شەشۋ ماقساتىندا «ەير استانا» ءۇندىستانعا بارۋ-كەلۋ ۇشۋلارىن ورىنداۋ ءۇشىن جانارماي قۇيۋعا ومان كورولدىگىنە قونۋ ارقىلى بالاما باعدار كەلىسىمىنە قول جەتكىزىپ وتىر.
