اسقار مامين تۇركىستان وبلىسىنىڭ جاڭا اكىمىن ءوڭىر اكتيۆىنە تانىستىردى
اكتيۆ جيىنىنا وبلىستىق ءماسليحات دەپۋتاتتارى مەن اۋدان- قالا اكىمدەرى، وبلىستىق دەپارتامەنت جانە باسقارما باسشىلارى قاتىستى، دەپ حابارلايدى قازاقپارات ءتىلشىسى.
پرەمەر- مينيستر تۇركىستان وبلىسىنىڭ اكتيۆىمەن وتكەن كەزدەسۋدە جانسەيىت تۇيمەبايەۆقا اتقارعان جۇمىسى ءۇشىن العىس ءبىلدىردى. تۇركىستان قالاسىنىڭ العاشقى اكىمى رەتىندە ول وبلىس ورتالىعىن تۇركىستان قالاسىنا كوشىرۋ، جاڭا وبلىستىڭ اكىمشىلىك-اۋماقتىق قۇرىلىمىن ۇيىمداستىرۋ، كوشى-قون ماسەلەلەرىن، جاڭا قالانىڭ اۋقىمدى قۇرىلىس جۇمىستارىن ۇيىمداستىرۋ بويىنشا ءبىرقاتار جۇمىستاردى اتقارعانىن اتاپ ءوتتى.
«جانسەيىت قانسەيىت ۇلى وسى وڭىردە اتقارعان جاۋاپتى جۇمىسىنىڭ ناتيجەسىندە وبلىستىڭ الەۋمەتتىك- ەكونوميكالىق دامۋىنا جاڭا سەرپىن بەردى. ەلباسى الدىنا قويعان تاپسىرمالاردى ناتيجەلى ورىنداپ، ايماقتىڭ دامۋىنا ۇلكەن ۇلەس قوستى. تاپسىرىلعان سەنىمدى ابىرويمەن اتقارا ءبىلدى. جاڭادان قۇرىلعان تۇركىستان وبلىسىنىڭ اكىمشىلىك- ىسكەرلىك ورتالىعىنىڭ، جاڭا قالانىڭ قۇرىلىس جۇمىستارىن ۇيىمداستىرۋ بويىنشا ءبىرقاتار جۇمىستار اتقاردى. وسى جۇمىستارى ءۇشىن جانسەيىت قانسەيىت ۇلىنا العىس ايتامىز»، - دەدى اسقار مامين.
ءوز كەزەگىندە وبلىستى ەكى جىلدان اسا باسقارعان جانسەيىت تۇيمەبايەۆ تا ءسوز سويلەپ، ەلباسى نۇرسۇلتان نازاربايەۆ پەن ايماق تۇرعىندارىنا جانە ارىپتەستەرىنە ءوز ريزاشىلىعىن جەتكىزدى.
«وسى ەكى جارىم جىلدىڭ ىشىندە ەلباسىمىزدىڭ تاپسىرماسىن ورىنداۋدا، العا قويعان ماقساتتاردى جۇزەگە اسىرۋدا بارلىق شارۋالاردى مۇمكىندىگىنشە ويداعىداي اتقارۋعا تىرىستىق. اسىرەسە، تاريحي كەزەڭ بولىپ تابىلاتىن تۇركىستان وبلىسى ورتالىعىنىڭ تۇركىستان قالاسىنا اۋىسۋ كەزەڭىندە كوپتەگەن جۇمىستار اتقارىلدى. قازىرگى تاڭنىڭ وزىندە ءبىرشاما جۇمىستار جۇزەگە اسىپ وتىر. ءبىز ءارقاشان ەلباسىمىزدىڭ جانىنداعى ساربازدارىمىز. سوندىقتان دا قانداي جاعداي بولماسىن، قانداي لاۋازىمدا بولماسىن، ءبىز ءار فرونتتا جۇمىس ىستەۋگە دايىنبىز. وسى مۇمكىندىكتى پايدالانا وتىرىپ، الدىمەن وڭتۇستىك قازاقستان وبلىسى، ودان كەيىن تۇركىستان وبلىسى اكىمى اكىمشىلىك قىزمەتىن سەنىپ تاپسىرعانى ءۇشىن ەلباسىمىز نۇرسۇلتان نازاربايەۆقا ۇلكەن العىسىمدى ايتقىم كەلەدى»، - دەدى جانسەيىت تۇيمەبايەۆ.
