استانا اكىمى جاس ءوسپىرىم ولىمىنە قاتىستى اۋدان اكىمىنە قاتاڭ سوگىس جاريالادى
ەلوردا اكىمى، سونداي-اق وتىن-ەنەرگەتيكا كەشەنى جانە كوممۋنالدىق شارۋاشىلىق باسقارماسى باسشىسىنىڭ ورىنباسارى يگور الەكسەيەۆكە، «استانا سۋ ارناسى» ديرەكتورى تابيعات زەينۋلقابدەنگە، كارىز قىزمەتىنىڭ باستىعى قۋانىش سۇلتانبايەۆ پەن الماتى اۋدانى كاناليزاتسيا ۋچاسكەسىنىڭ باستىعى ۆلاديمير ۆلاسەنكوعا قاتاڭ سوگىس جاريالادى، دەپ حابارلايدى استانا اكىمدىگىنىڭ رەسمي سايتى.
بۇگىن باقىت سۇلتانوۆتىڭ توراعالىعىمەن استانا قالاسى اكىمدىگىنىڭ كەزەكتى وتىرىسى بولىپ ءوتتى. جيىن بارىسىندا جاقىندا جاس ءوسپىرىمنىڭ قالاداعى قۇدىقتاردىڭ بىرىندە قازا بولۋىنا وراي ۋاكىلەتتى تۇلعالاردىڭ جاۋاپكەرشىلىگى تۋرالى ءسوز بولدى.
«وكىنىشكە قاراي، 19 -اقپاندا تاعى ءبىر قايعىلى وقيعا ورىن الدى. 13 جاستاعى جاس ءوسپىرىم قالاداعى اشىق قۇدىقتىڭ بىرىنە قۇلاپ، قازا تاپتى. توتەنشە جاعداي وتكەندەگىدەي الماتى اۋدانىنىڭ اۋماعىندا ورىن الدى. اشىق قۇدىق «استانا سۋ ارناسى» مەملەكەتتىك كاسىپورنىنا تيەسىلى. وسىدان بىرنەشە اي بۇرىن جاس ءوسىپىرىم قىز ءدال وسىنداي جاعدايدا قايتىس بولعاندا اۋدان اكىمدەرىنە قاتاڭ سوگىس جاريالاۋمەن عانا شەكتەلىپ ەدىك. بۇل جازالاۋ ءتۇرى سىزدەرگە از سياقتى بولىپ وتىر! ەندەشە، الماتى اۋدانىنىڭ اكىمى ادىلبەك سارسەمبايەۆقا قاتاڭ سوگىس جاريالايمىن»، - دەدى قالا اكىمى.
وتىن-ەنەرگەتيكا كەشەنى جانە كوممۋنالدىق شارۋاشىلىق باسقارماسى باسشىسىنىڭ ورىنباسارى يگور الەكسەيەۆكە، «استانا سۋ ارناسى» م ك ك ديرەكتورى تابيعات زەينۋلقابدەنگە، كارىز قىزمەتىنىڭ باسشىسى قۋانىش سۇلتانبايەۆ پەن الماتى اۋدانى كارىز ۋچاسكەسىنىڭ باسشىسى ۆلاديمير ۆلاسەنكوعا وسىنداي جازا بەلگىلەندى.
قالالىق قوعامدىق دەنساۋلىق ساقتاۋ باسقارماسى باسشىسىنىڭ م. ا. ءاليا رۇستەموۆا دا ەلوردا اكىمىنەن سوگىس الدى. قۇدىقتار قاقپاعى ۇرلىعىنىڭ الدىن الۋ ماقساتىندا قالالىق اكىمدىك كوپتەگەن جۇمىستاردى اتقارىپ جاتىر. قالاداعى بارلىق قۇدىقتاردىڭ ءتىزىمى قايتا جاسالۋدا. جەلىلەر جوبالارىندا قاقپاقتاردى پوليمەرلىك ماتەريالدان، سونداي-اق ارنايى تورلاردى پوليەتيلەننەن جاساۋ كوزدەلگەن.
«تور قۇدىق قاقپاعى ۇرلانعان كۇننىڭ وزىندە قۇدىققا ادامنىڭ، جان-جانۋاردىڭ تاعى دا باسقا زاتتاردىڭ ءتۇسىپ كەتۋىنەن ساقتايدى. قازىر 6 مىڭ قۇدىققا تور ورناتىلعان»، - دەپ حابارلادى و ە ك ك ش ب- دا.
ودان بولەك، قۇدىقتار قاقپاعىن ۇرلاۋدى بولدىرماۋ جانە وعان ادامداردىڭ ءتۇسىپ كەتۋىنىڭ الدىن الۋ ماقساتىندا جاڭا جوبالاردا قاقپاقتاردى كومپوزيتتىك ماتەريالداردان جاساپ ورناتۋ كوزدەلگەن. قازىرگى زامانعى ونەركاسىپ تالاپتارى ەسكەرىلە وتىرىپ جاسالاتىن پوليمەرلى- قۇمدى بۇيىمدار قاۋىپسىزدىك تەحنيكاسى مەن ەكولوگيالىق نورمالاردىڭ بارلىق تالاپتارىنا جاۋاپ بەرەدى. جاسىرىن بايلانىس جەلىلەرىن توسەۋ كەزىندە وڭاي قول جەتكىزۋدى قامتاماسىز ەتەدى. ەڭ باستىسى، ول مەتالل ەمەس، ونى تەمىر قابىلداۋشىلارعا تاپسىرا المايسىز. سول سەبەپتى ۇرلىقشىلارعا ونى قولدى قىلۋدىڭ پايداسى بولمايدى. سونىمەن قاتار، استانا قالاسى پوليتسيا دەپارتامەنتى قۇدىق قاقپاقتارى ۇرلىعىنىڭ الدىن الۋ ماقساتىندا جۇيەلى تۇردە تەكسەرىس، ەسكەرتۋ، ءتۇسىندىرۋ جۇمىستارىن جۇرگىزەدى.
باقىت سۇلتانوۆ 19 -اقپانداعى №2 -پەريناتالدىق ورتالىقتا بولعان جانتۇرشىگەرلىك وقيعانى تىلگە تيەك ەتتى. ورتالىقتىڭ بوسانۋ بولىمىندە كەلىنشەك دارىگەرلەردىڭ كومەگىنسىز، ءوزى ەدەندە بوسانىپ قالدى.
«ابىروي بولعاندا بالا مەن انانىڭ دەنساۋلىعىنا زيان كەلمەگەن. ءبىراق بۇل جاعداي ەرەكشە باقىلاۋعا الىنۋى ءتيىس دەپ ويلايمىن»، مۇنداي وقيعالار جۇيەسىزدىكتىڭ سالدارىنان ورىن العان»، - دەدى وسىعان بايلانىستى سۇلتانوۆ.
سونىمەن قاتار، ول 2018 -جىلى بوسانۋ كەزىندە سەگىز ايەلدىڭ قايتىس بولعانىن، وقيعالار سانىنىڭ 2017 -جىلعى كورسەتكىشتەن ءتورت ەسە جوعارى ەكەندىگىن العا تارتتى. «ءبىزدىڭ دەنساۋلىق ساقتاۋ جۇيەسىندە مۇنداي بەي-بەرەكەتسىزدىك نەلىكتەن ورىن الۋدا؟» - دەپ سۇرادى ا. رۇستەموۆادان قالا اكىمى.
«مۇنداي جاعدايدىڭ ورىن العانى، راس. بوسانۋشى 18 -اقپاندا كەلدى. 19 -اقپاندا ونىڭ تولعاعى كۇشەيە ءتۇستى. ساعات 12-دە بولىمشە مەڭگەرۋشىسى ونى قاراعاندا، ول بوسانۋ بولىمشەسىندە بولعان. ول جىلدام بوساندى. بۇل كۇنى بولىمشەدە 37 ايەل تۋدى. وسى ۋاقىتتا ءۇش اكۋشەر ءتورت ايەلدى بوساندىرىپ جاتقان بولاتىن. سونداي-اق، بولىمدە كۇردەلى وپەراتسيا جاسالىپ جاتتى. وعان دارىگەرلەرىمىزدىڭ بارلىعى جۇمىلدىرىلعان بولاتىن. نە دەسەكتە، بۇل جاعدايدا ولقىلىقتار بار»، - دەدى ا. رۇستەموۆا.
«دەمەك، ءتيىستى كۇش سالۋ كەرەك. سىزگە رەسمي تۇردە ەسكەرتۋ جاساپ وتىرمىن. بارلىق جۇيە بويىنشا شارالار قولدانىڭىز. بۇل بارلىق باسقا مەديتسينالىق مەكەمەلەر ءۇشىن بەلگى بولۋى ءتيىس. سونداي-اق، بارلىق دەنساۋلىق ساقتاۋ نىساندارىنىڭ جۇمىسىنا مونيتورينگ جۇرگىزىپ، شتاتتان تىس بارلىق جاعدايلار بويىنشا ناقتى ءىس-قيمىل الگوريتمىن پىسىقتاڭىز»، - دەدى ب. سۇلتانوۆ.
www.24.kz
