جاڭا ۇكىمەت شەشۋى ءتيىس باستى ماسەلە نە - ساراپشى پىكىرى
«جاڭا ۇكىمەتتىڭ باستى ماقساتى - جۇيەلى جۇمىس قۇرۋ. ەگەر دە تالداۋ جاساساق، بىزدە ءار مينيسترلىك ءوزىنىڭ مۇددەسىنە جۇمىس ىستەپ جاتىر. وسى ورايدا جۇيەلى تۇسىنىستىك قۇرىلماعان» ، - دەدى يۋ. كۋچينسكايا «نۇر وتان» پارتياسىنىڭ كەزەكتى XVIII سەزى قارساڭىندا ءبىلىم سالاسىنا ارنالعان پانەلدىك سەسسيا كەزىندە تىلشىلەرگە بەرگەن سۇحباتىندا.
سونىمەن قاتار ول اتقارىلعان كەيبىر شارالاردى كەيبىر ۆەدومستۆو وكىلدەرىنىڭ بىلمەي جاتاتىنىن اتاپ ءوتتى.
«ءبىلىم مينيسترلىگىندەگى جاعدايدان ەڭبەك جانە حالىقتى الەۋمەتتىك قورعاۋ مينيسترلىگى حابارسىز بولۋى مۇمكىن. الايدا بۇل سالالار ءوزارا بايلانىستى. جاعدايى قيىن وتباسىلارداعى بالالاردى قولداۋدى ەڭبەك مينيسترلىگى جۇزەگە اسىراتىن بولسا، بۇل ىستەن ءبىلىم مينيسترلىگى دە تىس قالماۋى ءتيىس. قوس ۆەدومستۆو دا اتا- انالارمەن جانە بالالارمەن جۇمىس ىستەيدى، ءبىراق جۇيەلى جۇمىس بايقالمايدى. سوندىقتان ءبىرىنشى كەزەكتە وسى باعىتتاعى شارالاردى پىسىقتاۋ كەرەك» ، - دەدى ساراپشى.
يۋليا كۋچينسكايا 27 - اقپان كۇنى «نۇر وتاننىڭ» XVIII سەزىندە پارتيانىڭ باعدارلاماسى جاريالاناتىنىن، وندا ماقساتتار مەن مىندەتتەر حابارلاناتىنىن جەتكىزدى.
«ۇكىمەتپەن، دەپۋتاتتارمەن بىرلەسە بارلىق العا قويىلعان ماقساتتاردى جۇزەگە اسىرۋ ءۇشىن قاجەتتى تەتىكتەردى قامتاماسىز ەتۋگە ءتيىستى بولامىز» ، - دەدى «نۇر وتان» پارتياسىنىڭ وكىلى.
