سولتۇستىك قازاقستان وبلىسىندا ەكى جۇزدەن استام دارىگەر جەتىسپەيدى

بۇل جايىندا س ق و اكىمدىگىنىڭ وتىرىسىندا بەلگىلى بولدى. دەنساۋلىق ساقتاۋ باسقارماسىنىڭ مالىمەتىنشە، وڭىردە 28 تەراپيەۆت، 27 جالپى تاجىريبە دارىگەرى، 21 پەدياتر، 15 انەستەزيولوگ- رەانيماتولوگ، سونداي- اق اكۋشەر- گينەكولوگتار، حيرۋرگتەر، دارىگەر- زەرتحاناشىلار جەتىسپەيدى.

بىلتىر اۋىلدىق جەرلەرگە كەلگەن 40 مامانعا وبلىستىق بيۋدجەتتەن 1,5 ميلليون تەڭگەدەن تولەنگەن. بۇدان باسقا ولارعا 168 مىڭ تەڭگەدەن كوتەرمە اقى بەرىلەدى (قالادا 481 مىڭ تەڭگە). ءۇي سالۋعا نەمەسە ساتىپ الۋعا 3,6 ميلليون تەڭگە بيۋدجەتتىك نەسيە قاراستىرىلعان. پەتروپاۆلداعى «دارىگەرلەر ۇيىنەن» 96 مەديتسينالىق قىزمەتكەرگە باسپانا بەرىلگەن. اۋىلدىق جەرلەردە 15 دارىگەر تۇرعىن ۇيمەن قامتىلىپ وتىر.

استانا جانە قاراعاندى مەديتسينالىق جوعارى وقۋ ورىندارىنىڭ 56 تۇلەگىمەن س ق و جۇمىسقا كەلۋ تۋرالى كەلىسىمگە قول قويىلدى.

«اۋدان اكىمدەرى باس دارىگەرلەرمەن بىرلەسە جۇمىس اتقارۋى قاجەت. اۋىلداردا دارىگەرلەرگە، سونىڭ ىشىندە مامان- دارىگەرلەرگە باسپانا بەرىلسىن. اۋدان اكىمدەرىنىڭ جۇمىسىن 3 - توقساندا دارىگەرلەردى ەلدىمەكەندەرگە تارتۋى بويىنشا باعالايتىن بولامىز»، - دەدى دەنساۋلىق ساقتاۋ باسقارماسى باسشىسىنىڭ ەسەبىن تىڭداعان وبلىس اكىمى قۇمار اقساقالوۆ.

 دەنساۋلىق ساقتاۋ باسقارماسىنىڭ باسشىسى تيمۋر سۇلتانعازييەۆتىڭ ايتۋىنشا، 13 اۋداندىق اۋرۋحانانىڭ تەك بىرەۋىندە عانا شتاتتىق قىزمەتتە كارديولوگ جۇمىس ىستەپ جاتىر. قالعاندارىندا كارديولوگتىڭ مىندەتىن وسى ماماندىق بويىنشا جارتى جىلدىق قايتا دايارلىقتان وتكەن باسقا سالا دارىگەرلەرى قوسا اتقارىپ ءجۇر.

جالپى، بىلتىر سولتۇستىك قازاقستاندىقتارعا مەملەكەتتىك مەديتسينالىق ۇيىمداردا 1,5 مىڭ دارىگەر مەن 5 مىڭنان استام ورتا مەديتسينالىق قىزمەتكەر مەديتسينالىق كومەك كورسەتىپتى.

اۆتور: اقەركە داۋرەنبەك قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى