مەملەكەتتىك ورگاندار جۋرناليستەردى جىلىنا ءبىر رەت اككرەديتاتسيادان وتكىزەدى
بيىل اتالعان ەرەجەلەرگە وزگەرىس ەنگىزىلدى. ال 13 -اقپاندا ونى كەڭىنەن تالقىلاۋ شارالارى باستالدى. ق ر اقپارات جانە كوممۋنيكاتسيالار مينيسترلىگىنىڭ ەكس ۆيتسە-ءمينيسترى نۇرگۇل ماۋبەرلينوۆانىڭ ايتۋىنشا، جاڭا ەرەجەلەر مەملەكەتتىك ورگانداردا ءبىر جىلعا اككرەديتاتسيادان وتۋگە مۇمكىندىك بەرەدى.
«ماسەلەن، ماجىلىستە جۋرناليستەردى ءبىر جىلعا اككرەتياتسيالاپ قويادى. دەمەك، بۇقارالىق اقپارات قۇرالدارى ءبىر رەت تىركەلەدى دە، ءبىر جىل بويى ماجىلىسكە كىرىپ شىعا بەرەدى. ءبىراق باسقا مەملەكەتتىك ورگانداردا ونداي جۇيە جوق. ال جاڭا ەرەجەلەرگە سايكەس، جۋرناليستەر ءبىر-اق رەت قاجەتتى قۇجاتتاردى جىبەرىپ، اككرەديتاتسيادان ءوتىپ الادى دا، بولدى. ءسويتىپ، ق ر اۋىل شارۋاشىلىعى مينيسترلىگى، ق ر ءبىلىم جانە عىلىم مينيسترلىگى، ق ر دەنساۋلىق ساقتاۋ مينيسترلىگى جانە باسقا دا مەملەكەتتىك ورگاندار وتكىزەتىن شارالارعا كىرە بەرۋگە بولادى. قۇجاتتاردى ءبىر جىبەرەسىز دە، مەملەكەتتىك ورگاننىڭ تىركەۋىندە ءبىر جىل بويى تۇرا بەرەسىز»، - دەيدى ن. ماۋبەرلينوۆا.
تالقىلاۋ بارىسىندا جەكە قۇجاتتارعا قاتىستى ماسەلەلەر دە كوتەرىلدى. ماسەلەن، اككرەديتاتسيا كەزىندە جۋرناليستىڭ ەڭبەك شارتىن تالاپ ەتۋى ابدەن مۇمكىن. قازىرگى ەرەجەلەردە ونداي تەتىكتەر بار. بۇدان بولەك، ءىس-شارادا ورىن جەتىسپەي جاتقاندا بۇقارالىق اقپارات قۇرالدارىن وتكىزبەۋ، مەكەمەنىڭ ىشكى ءتارتىبى مەن مودەراتوردىڭ رەگلامەنتىنە قاتىستى ءبىرقاتار ماسەلەلەر بار. بۇنىڭ ءبارى جۋرناليستەردى تىركەۋدەن وتكىزۋ كەزىندە قيىندىقتار تۋعىزۋى ىقتيمال. ال كەيبىر جاعدايلاردا مودەراتوردىڭ جەكە ۇستانىمىنا قاراي ىعىسۋى ابدەن مۇمكىن. سول سەبەپتى اتالعان ماسەلەلەردىڭ ءبارى ارى قاراي تالقىلاناتىن بولادى. سونىڭ ناتيجەسىندە ناقتى ۇسىنىستاردى ازىرلەۋ كوزدەلگەن.
ايتا كەتەيىك، بۇعان دەيىن ق ر اقپارات جانە كوممۋنيكاتسيالار ءمينيسترى داۋرەن ابايەۆ جۋرناليستەردى اككرەديتاتسيالاۋ ەرەجەلەرىن كەڭىنەن تالقىلاۋدى تاپسىرعان بولاتىن.
«بۇقارالىق اقپارات قۇرالدارىن اككرەديتاتسيالاۋ ەرەجەلەرىنىڭ جوباسىن ەرەكشە اتاپ وتكىم كەلىپ وتىر. ۆيتسە- مينيستر نۇرگۇل وسەرباي قىزى ماۋبەرلينوۆاعا اتالعان جوبانى كەڭىنەن تالقىلاۋدى تاپسىرامىن. جۋرناليستەردىڭ بارلىق ۇسىنىستارى مەن ەسكەرتۋلەرىن قامتۋ قاجەت. اككرەديتاتسيالاۋ ەرەجەلەرى تەك كونسەنسۋس نەگىزىندە عانا قابىلدانۋى شارت. بۇقارالىق اقپارات قۇرالدارىنىڭ پىكىرلەرىن بارىنشا ەسكەرۋ كەرەك»، - دەدى د. ابايەۆ مينيسترلىكتىڭ القا ماجىلىسىندە.
بۇگىن ق ر پارلامەنتى ءماجىلىسىنىڭ الەۋمەتتىك-مادەني دامۋ كوميتەتى داۋرەن ابايەۆتى جاڭادان قۇرىلعان اقپارات جانە قوعامدىق دامۋ ءمينيسترى لاۋازىمىنا ماقۇلدادى.
