دوپتى حوككەي: قازاقستاندىق شابۋىلشى رەسەي چەمپيوناتىنداعى ماتچتا بەس گول سوقتى

«سيبسەلماش» ستاديونىندا وتكەن ماتچ ايدىڭ يەلەرىنىڭ ايقىن باسىمدىلىعىن پاش ەتتى - 10:4.

بۇل كەزدەسۋدە قازاقستان ۇلتتىق قۇراماسىنىڭ كاپيتانى، ورال دوپتى حوككەيىنىڭ تۇلەگى راۋان يساليەۆ ءبىر ءوزى بەس گولدىڭ اۆتورى اتاندى.

كوپتەن بەرى «سيبسەلماش» ساپىندا ونەر كورسەتەتىن ر. يساليەۆ قازىردىڭ وزىندە كلۋب تاريحىنداعى ەڭ ۇزدىك مەرگەندەردىڭ بىرىنە اينالىپ ۇلگەردى.

وسىنىڭ الدىندا 18- اقپان كۇنى كيروۆ قالاسىندا جەرگىلىكتى «رودينانىڭ» قاقپاسىنا قوس گول ەنگىزگەن راۋان رەسەي چەمپيوناتىندا سوققان دوپ سانىن 201 گە جەتكىزگەن ەدى.

بەنديمەن اينالىسۋدى ورال قالاسىندا، «اقجايىق» كومانداسىندا باستاعان ر. يساليەۆ كەيىن رەسەيلىك «ۆودنيك» (ارحانگەلسك)، «ستارت» (نيجنيي نوۆگورود) كلۋبتارىندا وينادى. 2012-جىلدان بەرى «سيبسەلماشتىڭ» نامىسىن قورعاپ كەلەدى.

2011-جىلى الماتىدا وتكەن ازيا ويىندارىنىڭ چەمپيونى ءارى ۇزدىك مەرگەنى، 2012، 2013، 2014 جانە 2015-جىلعى الەم بىرىنشىلىگىنىڭ قولا جۇلدەگەرى بولدى.

راۋان 2018-جىلى حاباروۆسك قالاسىندا وتكەن الەم چەمپيوناتىنىڭ ۇزدىك مەرگەنى اتاندى. ول سوندا 21 گول سوعىپ، 7 مارتە ناتيجەلى پاس بەردى.

بيىل شۆەتسيانىڭ ۆەنەرسبورگ قالاسىندا وتكەن الەم چەمپيوناتىنان دا ر. يساليەۆ قۇر كەتپەي، ءتورت گولدىڭ اۆتورى اتاندى.

ەسكە سالا كەتەيىك، بۇدان بۇرىن قازاقستان قۇراماسىنىڭ الەم چەمپيوناتىندا ءتورتىنشى ورىنعا تابان تىرەگەنىن جازعان بولاتىنبىز.

جۋىردا ماۋسىمدى قورىتىندىلاعان «اقجايىقتىڭ» كاپيتانى ماكسيم وتەباليەۆ باستاعان سەگىز ويىنشى كراسنويارسك قالاسىندا وتەتىن  ХХІХ  قىسقى ۋنيۆەرسيادادا ەل نامىسىن قورعايدى.

بۇگىن ولار قازاقستان قۇراماسى ساپىندا قىسقى ۋنيۆەرسياداعا اتتاندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى