قىتايدا اۋىل شارۋاشىلىعىنا باسىمدىق بەرىلەدى
كوممۋنيستىك پارتيانىڭ ورتالىق كوميتەتى مەن مەملەكەتتىك كەڭەسى №1 قۇجاتتى حالىق نازارىنا ۇسىندى. بيلىك 2020 -جىلعا قاراي جىرتىلاتىن جەر كولەمىن 120 ميلليون گەكتارعا ارتتىرىپ، 53 ميلليون گەكتار ەگىستىك القابىن جوعارى ستاندارتقا جەتكىزبەكشى. سونىمەن بىرگە اۋىل شارۋاشىلىعىنىڭ باستى ونىمدەرىن شىعارۋعا كوڭىل بولىنەدى.
مەملەكەت بۇل سالانىڭ قۇرىلىمدارىن وڭتايلاندىرىپ، جوعارى ساپالى ەكولوگيالىق تازا ءونىم ءوندىرۋدى كوزدەپ وتىر. اۋىل شارۋاشىلىعىنىڭ ەكولوگيالىق تازا ونىمدەرى مەن ازىق- تۇلىگىن شىعارۋ قازىر قىتايدىڭ باستى نازارىندا. مەملەكەت ساننان ساپاعا كوشۋدى مۇرات ەتەدى. ەلدەگى ءسۇت ونىمدەرىن شىعاراتىن زاۋىتتار جاپپاي جاڭعىرتىلىپ، بالالار تاعامىنىڭ قاۋىپسىزدىگىنە زەر سالىندى. مال اۋرۋلارىنىڭ الدىن الۋ شارالارى دا كۇشەيتىلەدى.
قىتاي الەمدە شوشقا ەتىن ەڭ كوپ تۇتىناتىن ەل بولعاندىقتان، افريكالىق وبانىڭ تارالۋىنا ساقتىقپەن قاراپ وتىر. قۇجاتتا «ءبىر بەلدەۋ- ءبىر جول» ستراتەگياسىنىڭ اياسىندا قىتاي باسقا مەملەكەتتەرمەن اۋىل شارۋاشىلىعى سالاسىنداعى ارىپتەستىگىن ارتتىرا تۇسەدى دەلىنگەن. بەيجىڭ شەتەلدىك ونىمدەردىڭ يمپورتىن ۇلعايتپاقشى. بۇل - قازاقستان ءۇشىن ءوز اۋىل شارۋاشىلىعى ونىمدەرىن ەكسپورتتايتىن جاقسى مۇمكىندىك. بۇدان بولەك اگرارلىق سالانى دامىتۋ مەن اۋىلدى قولداۋ جايىندا دا ايتىلدى.
حان چانفۋ، ق ح ر اۋىل شارۋاشىلىعى ءمينيسترى:
- 2020 -جىلعا قاراي اۋىل تۇرعىندارىنىڭ كىرىسى ورتاشا ەسەپپەن ەكى ەسەگە ءوسۋى ءتيىس. بۇل ورتاشا اۋقاتتى قوعام قۇرۋدىڭ ماڭىزدى كورسەتكىشى بولادى. سوڭعى جىلدارى اۋىل تۇرعىندارىنىڭ كىرىسى ءوسىپ كەلەدى. 2019-2020 -جىلدارى بۇل ءۇردىستى ساقتاۋىمىز قاجەت. سوندىقتان اۋىلداعى ءوندىرىستى دامىتۋ مەن اۋىلدىقتار كىرىسىن ءارتاراپتاندىرۋ بويىنشا ءبىرقاتار شارا قابىلداندى.
قىتاي 2019-2020 -جىلدارى اۋىلدى جەردەگى كەدەيلىكتى ءبىرجولا جويامىز دەگەن ماقسات قويىپ وتىر. ادامداردىڭ ازىق- تۇلىككە، كيىمگە جانە تۇرعىن ۇيگە دەگەن مۇقتاجدىعىن تولىقتاي قاناعاتتاندىرماقشى. ءار تۇرعىن كەم دەگەندە 25 شارشى مەتر باسپانامەن قامتىلۋى ءتيىس. سونىمەن بىرگە مەملەكەتتە 9 جىلدىق ورتاشا ءبىلىم مەن مەديتسينالىق كومەك تە قولجەتىمدى بولۋى كەرەك. اۋىلدا تۇراتىن ءاربىر ادامنىڭ جەكە تابىسىن جىلىنا 10 مىڭ يۋان، ياعني 500 مىڭ تەڭگەگە جەتكىزۋ جوسپارلانعان.
اۆتورلارى: نۇربەك بەكەن، جاڭ ءسۇي
www.24.kz
