جاڭا الىپبيگە كوشۋ: بيىل مۇعالىمدەردى دايىنداۋ جۇمىستارى باستالادى
بۇل تۋرالى ق ر مادەنيەت جانە سپورت مينيسترلىگى ش. شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى باس ديرەكتورىنىڭ مىندەتىن اتقارۋشى ديرەكتورى ەربول تىلەشوۆ ءمالىم ەتتى، دەپ حابارلايدى قازاقپارات.
«ءبىزدىڭ ورتالىقتىڭ نەگىزگى باعىتى - عىلىمي ساراپتامالار جۇرگىزۋ، سونداي-اق جاڭا ءالىپبيدىڭ ەملە ەرەجەلەرىن حالىققا تانىستىرۋ جانە قاجەتتى وقۋ قۇرالدارىمەن قامتاماسىز ەتۋ. 2018-جىلى جاڭا ءالىپبيدىڭ ەملە ەرەجەسى ساراپتاۋدان ءوتتى، شىلدە ايىنان جەلتوقسانعا دەيىن جۇرگىزىلدى. اتاپ ايتقاندا، 6- جەلتوقساندا ۇكىمەتتىڭ جانىنداعى ۇلتتىق كوميسسيادا ءالىپبيدىڭ ەملە ەرەجەلەرى ماقۇلداندى»، - دەدى ە. تىلەشوۆ.
ونىڭ سوزىنە قاراعاندا، بيىل ەندى لاتىن گرافيكاسىنا كوشۋ باعىتىندا مۇعالىمدەردى دايارلاۋ شارالارى ىسكە اسىرىلادى.
«2019-جىلداعى نەگىزگى جوسپارعا توقتالساق، بەكىتىلگەن ەملە ەرەجەنى حالىققا ۇيرەتۋ باعىتىنداعى شارالاردى ىسكە اسىرامىز. وسى باعىتتا قاجەتتى مامانداردى دايارلاۋعا ەكپىن قويامىز. سوعان بايلانىستى ءبىلىم جانە عىلىم مينيسترلىگىندە بيىلعا 9038 ادام، مادەنيەت جانە سپورت مينيسترلىگىندە 2400 ادام جوسپارلانعان. بۇل تۇرعىدا «ءتىل-قازىنا» ورتالىعى 2400 ادامدى استانادا وقىتادى. ەلىمىزدەگى مەملەكەتتىك ءتىلدى وقىتۋ ورتالىقتارىنداعى ۇستازدار مەن ادىسكەرلەر قامتىلادى. ءبىزدىڭ مينيسترلىك ەرەسەك ادامداردى وقىتۋدى قولعا الادى. ال ءبىلىم جانە عىلىم مينيسترلىگى مەكتەپ، كوللەدج، ۋنيۆەرسيتەتتەردى قامتيدى. اتاپ ايتقاندا، ەڭ باستاپقىدا حالىقتى وقىتاتىن ۇستازداردىڭ قۇرامىن دايىنداۋىمىز كەرەك»، - دەدى ەربول تىلەشوۆ.
وسى ورايدا ول 72 ساعاتتىق وقۋ باعدارلاماسى جاسالعانىن اتاپ ءوتتى.
«ناۋرىز ايىنىڭ اياعىنا قاراي، ءبىز ونىڭ وقۋ قۇرالىن دايىنداۋدى اياقتايمىز. وقۋ قۇرالى سايتقا سالىنىپ، كوپ تيراجبەن حالىققا تاراتىلادى. سوسىن بارلىق وڭىرلەردە سەمينارلار ۇيىمداستىرىلادى. مۇنىمەن قوسا، ورتالىق اتقارۋشى ورگاندار، بۇقارالىق اقپارات قۇرالدارى وكىلدەرى، كىتاپتاردى لاتىن قارپىندە شىعاراتىن باسپا رەداكتورلارى وقىتىلادى. بۇل باعىتتاعى جۇمىستار جالعاسا بەرەدى، ياعني بيىل ونلاين ساباقتاردى دايىندايمىز. وسى ونلاين ساباق حالىققا قولجەتىمدى بولادى»، - دەدى ول.
