فۋتبول: «اقجايىق» رەسەيلىك كلۋبپەن تەڭ وينادى

تارتىستى وتكەن ماتچ 1:1 ەسەبىمەن تەڭ اياقتالدى. «اقجايىقتىڭ» باس باپكەرى، ۋكراينالىق مامان سەرگەي زايتسيەۆتىڭ ايتۋىنشا، تۇركيادا وقۋ-جاتتىعۋ جيىنى باستالعاننان بەرى 15 كۇن وتكەن. سودان بەرى ويىنشىلار بارىنشا تەر توگىپ، ەڭبەكتەنۋدە.

«ەل بىرىنشىلىگىندەگى العاشقى ويىنعا دەيىن ءالى اي جارىمداي ۋاقىت بار. بۇل جيىندا سەلەكتسيالىق جۇمىسقا ءمان بەرىلدى. ەندى ەكىنشى وقۋ- جاتتىعۋ جيىنىندا جۇمىس اۋقىمىن كوبەيتىپ، كۇشتى كوماندالارمەن كەزدەسەتىن بولامىز. بۇگىنگى ويىندا «اقجايىق» قايسارلىعىن تانىتىپ، ەسەپتى تەڭەستىرە ءبىلدى»، دەدى س. زايتسيەۆ.

ورالدىق كلۋب ساپىنداعى تاجىريبەلى فۋتبولشىلاردىڭ ءبىرى رۋسلان قايىروۆتىڭ سوزىنە قاراعاندا، كوماندادا جاستار از ەمەس. «ءبىرىنشى تايمدا گول جىبەرىپ العانمەن، ەكىنشى كەزەڭدە قارىمتا قايىردىق. باپكەردىڭ تاپسىرماسىن ورىندادىق. «اقجايىقتا» جاستار از ەمەس. ءبىرىنشى ليگادا كوماندا قۇرامىندا كەمىندە ەكى جاس فۋتبولشى ويناۋى ءتيىس. سوندىقتان ءبىز ولارعا اقىل- كەڭەسىمىزدى ايتىپ، شەبەرلىكتەرىن جەتىلدىرۋىنە كومەكتەسۋدەمىز»، دەدى ر. قايىروۆ.

ەسكە سالا كەتەيىك، بۇدان بۇرىن «اقجايىقتىڭ» تۇركيادا جاتتىعىپ جاتقانىن جازعان بولاتىنبىز. 11- اقپان كۇنى ورالدىقتار «انديجان» (وزبەكستان) كومانداسىمەن جولداستىق كەزدەسۋ وتكىزەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى