جاستارعا ارنالعان پاتەرلەر بيىل بەرىلەدى - مينيستر كالەتايەۆ

ءمينيستردىڭ ايتۋىنشا، وسى ايدىڭ اياعىنا دەيىن اتالعان باستامانى ىسكە اسىرۋ تەتىكتەرىن ازىرلەۋ كوزدەلىپ وتىر. قازىرگى كەزدە تۇرعىن-ءۇي سالاسىنا جاۋاپتى مەمورگان - ق ر يندۋستريا جانە ينفراقۇرىلىمدىق مينيسترلىگىمەن تالقىلاۋ شارالارى باستالدى.

«جاستارعا ارنالعان پاتەرلەر بيىل تاراتىلادى. ەندى، ونى ءبىز ەمەس، جەرگىلىكتى اتقارۋشى ورگاندار بەرەدى. ءبىز ناقتى تالاپتارىن ازىرلەيمىز. اعىمداعى جىلى ءۇش قالاعا، شامامەن، 1 مىڭ پاتەر بولىنەدى. بۇل - پرەزيدەنتتىڭ تاپسىرماسى. سوندا استانا، الماتى مەن شىمكەنتتىڭ اربىرەۋىنە 300 دەن استام پاتەر كەلەدى»، - دەدى د. كالەتايەۆ قازاقپارات تىلشىسىنە بەرگەن سۇحباتىندا.

ونىڭ سوزىنە قاراعاندا، بيىل جاستارعا ارنالعان تيپتىك تۇرعىن ۇيلەردى سالىپ شىعۋ مۇمكىن ەمەس. وعان قوسا، ارەندالىق باسپانانىڭ اۋدانى 40-50 شارشى مەتر بولادى دەگەن جوسپار بار. سول سەبەپتى اكىمدىكتەر ازىرشە دايىن ۇيلەردى ساتىپ الادى دا، جاستارعا تاراتادى. ودان كەيىن تيپتىك نىسانداردى سالۋ جوسپارلانعان.

«ازىرشە، ارەندالىق تولەمنىڭ كولەمى 10-12 مىڭ تەڭگە بولسا ەكەن دەپ وتىرمىز. بۇل - الدىن الا ەسەپ. سوسىن كوممۋنالدىق تولەمدەر تاعى بار»، - دەپ اتاپ كورسەتتى د. كالەتايەۆ.

ايتا كەتەيىك، كۇنى كەشە سەناتتا وتكەن جيىندا مينيستر كالەتايەۆ جاستارعا پاتەر بەرۋ شارتتارىن جاريالاعان بولاتىن. «ءبىرىنشى پارامەتر بويىنشا 29 جاسقا دەيىنگى دەڭگەي ايقىندالدى، سەبەبى زاڭناماعا سايكەس، جاستار ساناتى 29 جاسقا دەيىن بەلگىلەنگەن. ەكىنشى پارامەترگە توقتالساق، جاستار مىندەتتى تۇردە جۇمىس ىستەۋى ءتيىس»، - دەدى د. كالەتايەۆ.

اتالعان تاپسىرمانى ق ر پرەزيدەنتى نۇرسۇلتان نازاربايەۆ جاستار جىلىنىڭ اشىلۋىندا جاريالادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى