استانادا سال اۋرۋىنا شالدىققان تاعدىردى باياندايتىن فيلمنىڭ تۇساۋى كەسىلدى
فيلمدە ب ت س پ- مەن (بالالاردىڭ تسەلەبرالدى پاراليچى) اۋىراتىن اسەل ەسىمدى بويجەتكەننىڭ تاعدىرى باياندالادى. سيۋجەت بويىنشا اسەلدىڭ ارمانى ومىردەن ءوز ماحابباتىن جولىقتىرىپ، سوعان تۇرمىسقا شىعۋ. ۋاقىت وتە كەلە بويجەتكەن تاحير ەسىمدى جىگىتتى كەزدەستىرىپ، ءومىرى وزگەرەدى.
«بۇل فيلم مۇمكىندىگى شەكتەۋلى جانداردىڭ تاعدىرىن باياندايتىن «بەزگرانيچنىە ۆوزموجنوستي» اتتى ديالوگيانىڭ ەكىنشى ءبولىمى. «بىت يلي نە بىت» اتتى ءبىرىنشى بولىمىندە سال اۋرۋىمەن اۋىراتىن جاس جىگىتتىڭ تاعدىرى بەينەلەنگەن. ال ەكىنشى بولىمدە اسەل ەسىمدى بويجەتكەننىڭ تاعدىرى باياندالادى. باستى رولدەگى كەيىپكەردىڭ ءومىرى ارقىلى، ادام الدىنا ماقسات قويسا، قانداي قيىنشىلىقتارعا قاراماستان ارمانىنا قول جەتكىزە الاتىنىن كورسەتكىمىز كەلدى. سول سياقتى اسەل تاعدىردىڭ بەرگەن سىنىنا قاراماستان، ءومىر سۇرۋگە دەگەن قۇشتارلىعى ءبىر ءسات سايابىرسىعان ەمەس، كەرىسىنشە ول كوپ دۇنيەنى ارمانداپ، ءوز ماقساتىنا قول جەتكىزە ءبىلدى»، - دەيدى فيلم رەجيسسەرى ءارى پروديۋسەرى ءازيزجان زايروۆ.
كينوتۋىندىنىڭ ايتىپ وتەر ەرەكشەلىگى، باستى ءرولدى سومدايتىن كەيىپكەرلەر كاسىبي ارتىستەر ەمەس. ودان بولەك، ءرولدى سومداۋشىلاردىڭ اراسىندا الماتىداعى «اردي» وڭالتۋ ورتالىعىنىڭ وقۋشىلارى دا بار.
«مۇمكىندىگى شەكتەۋلى جاندار تۋرالى باياندايتىن بۇل فيلم كورەرمەنگە وي سالاتىن، وتە كۇردەلى تۋىندى. وكىنىشكە قاراي، بۇگىندە ءبىز قوعامداعى مۇمكىندىگى شەكتەۋلى جانداردىڭ ءومىرى جايلى، ولاردىڭ اينالىساتىن ىستەرى، قىزىعۋشىلىقتارى، سونداي-اق العا قويعان ماقساتتارى مەن ارمان-تىلەكتەرى جايلى بىلە بەرمەيمىز. ستاتيستيكاعا سۇيەنسەك، قازاقستاندا 600 مىڭنان استام مۇمكىندىگى شەكتەۋلى ادام تۇرىپ جاتىر ەكەن، بۇل جالپى حالىق سانىنىڭ %3,5 قۇرايدى. وسى تۇرعىدا مۇگەدەكتىگى بار جاندارعا جاعداي جاساۋ، ولارعا قولجەتىمدى ورتا قۇرۋ مەن قوعامنان تىس قالماۋىنا ءجىتى كوڭىل ءبولۋ، ءبىزدىڭ باستى ماقساتىمىزدىڭ ءبىرى»، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى.
ق ر مادەنيەت جانە سپورت مينيسترلىگىنىڭ تاپسىرىسىمەن «قازاق فيلم» كينوستۋدياسى تۇسىرگەن «قىز بەن تەڭىز» فيلمىنىڭ رەجيسسەرى مۇحامەد مامىربەكوۆ پەن ءازيزجان زايروۆ.
باستى رولدەردە دينارا ءشارىپوۆا، تاحير وماروۆ، قاناعات تاسقارايەۆ، گۇلباحرام بايبوسىنوۆا، ساۋران قاستەيەۆ، المات ادىلبايەۆ جانە باسقالار.
