استانا ا ق ش پەن رەسەيدىڭ زىمىران شەشىمىنە الاڭدايدى
س ءى م مالىمدەمەسىندە: «قازاقستان تاراپى شارتتىڭ ساقتالۋىن، بارلىق تالاپتارىنىڭ ورىندالۋىن قولدايدى. يادرولىق قارۋدى تاراتپاۋ تۋرالى شارت - قارۋسىزدانۋدا ەلەۋلى پروگرەسكە قول جەتكىزۋگە مۇمكىندىك بەرگەن تاريحي كەلىسىم» دەپ جازىلعان.
مينيسترلىك «شارتتان شىعۋ قادامى جاھاندىق بەيبىتشىلىك پەن قاۋىپسىزدىككە قاۋىپ توندىرەتىنىن» ايتقان. رەسمي استانا «پرەزيدەنت نۇرسۇلتان نازاربايەۆتىڭ 2045-جىلعا وراي يادرولىق قارۋدان ازات الەمگە قول جەتكىزۋگە ارنالعان باستامالارىنىڭ وزەكتى ەكەنىن» ەسكەرتكەن.
قازاقستان ءوز مالىمدەمەسىندە ا ق ش پەن رەسەيدى ماسەلەنى كەلىسسوز ارقىلى شەشۋگە شاقىرعان.
بۇعان دەيىن ا ق ش پرەزيدەنتى دونالد ترامپ 2- اقپاننان باستاپ زىمىران جويۋ كەلىسىمىن توقتاتاتىنىن مالىمدەگەن. ترامپ جازباشا مالىمدەمەسىندە: «رەسەي [كەلىسىمدى بۇزاتىن] ارەكەتىن بۇركەمەلەپ جاتقاندا ءبىز [كەلىسىمنىڭ] شارتتارىمەن شەكتەلىپ وتىرا المايمىز» دەگەن. كەيىن رەسەي پرەزيدەنتى ۆلاديمير پۋتين دە «امەريكالىق ارىپتەستەر كەلىسىمنەن شىعاتىنىن جاريالادى، ءبىز دە سولاي ىستەيمىز» دەپ، جاۋاپ رەتىندە شارتتان شىعاتىنىن ايتقان.
1987-جىلى ا ق ش پەن سوۆەت وداعىنىڭ باسشىلارى قول قويعان «ورتا جانە قىسقا قاشىقتىققا ارنالعان يادرولىق زىمىرانداردى جويۋ» كەلىسىمى ەۋروپا مەن وزگە دە ايماقتاعى بەيبىتشىلىكتىڭ كەپىلى رەتىندە قابىلدانىپ كەلگەن. ءبىراق سوڭعى ۋاقىتتا ۆاشينگتون مەن ماسكەۋ بۇل قۇجاتقا قاتىستى كەلىسپەي قالىپ جۇرگەن.
ا ق ش پەن ناتو 9M729 اتتى يادرولىق قاناتتى زىمىران جاساۋ ارقىلى رەسەي تاريحي كەلىسىمدى بۇزدى دەپ ايىپتاعان. ال رەسەي «بۇل زىمىراننىڭ ۇشۋ الىستىعى 500 دەن اسپايدى، سايكەسىنشە كەلىسىم شارتتارىن بۇزعان جوقپىز» دەگەن.
«ازاتتىق»
