قازاقستان مەن ا ق ش اۋە قاتىناسى كەلىسىمىنە ناۋرىزدا قول قويىلادى
بۇل تۋرالى بۇگىن ۇكىمەت وتىرىسىندا ق ر يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك ايتتى، دەپ حابارلايدى قازاقپارات ءتىلشىسى.
«اعىمداعى جىلى مينيسترلىك «ەير استانا» اۆياكومپانياسىمەن بىرلەسىپ توكيو، نيۋ-يورك، شاڭحاي جانە الەمنىڭ باسقا دا ءىرى قالالارى باعىتتارى بويىنشا اۋە قاتىناسىن اشۋ جونىندە ءتيىستى شارالار قابىلدايتىن بولادى. قازىرگى كۇنى توكيو بويىنشا جاپون تاراپىمەن كەلىسىمگە قول قويىلدى»، - دەدى مينيستر.
ونىڭ ايتۋىنشا، بيىل ا ق ش- قا ۇشۋ ءۇشىن اككرەديتاتسيا ءراسىمى باستالادى.
«مينيسترلىك «اشىق اسپان» جوباسى بويىنشا قازاقستان مەن ا ق ش اراسىندا اۋە قاتىناسى تۋرالى ۇكىمەتارالىق كەلىسىم جوباسىن قول قويۋعا ازىرلەدى. قول قويۋ بيىل ناۋرىز ايىنا جوسپارلانىپ وتىر. جالپى بيىل 4 باعىت بويىنشا رەيستەردى ۇلكەن قالالارعا شىعارامىز دەپ جوسپارلاپ وتىرمىز»، - دەدى ج. قاسىمبەك.
ايتا كەتەيىك، ۇكىمەتتىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ امەريكا قۇراما شتاتتارى مەن جاپونياعا تىكەلەي اۋە رەيسىن اشۋ ماسەلەسى بيىل شەشىلۋى ءتيىس ەكەندىگىن ايتقان بولاتىن.
