پرەمەر-مينيستر مينيسترلەرگە ءۇش تاپسىرما جۇكتەدى
«ەلباسىنىڭ تاپسىرماسىنا بايلانىستى نەگىزگى باعىتتار بويىنشا مينيسترلىكتەردىڭ العا قويعان جوسپارى تالقىلاندى. بۇعان قوسىمشا ءبىرقاتار تاپسىرما بار. ءبىرىنشى، ۇلتتىق ەكونوميكا مينيسترلىگىنە جانە اكىمدەرگە قارجى، ءبىلىم مينيسترلىكتەرىمەن بىرگە مەكتەپ سالۋ مەن جوندەۋ فۋنكتسيالارىن ولاردى قارجىلاندىرۋ فۋنكتسيالارىمەن بىرگە وڭىرلەرگە بەرۋ ماسەلەسىن پىسىقتاۋدى تاپسىرامىن. بۇل بيۋجەت پروتسەستەرىن وڭتايلاتىپ، مەكتەپ سالۋدى نەمەسە جوندەۋدى جىلدامداتۋعا مۇمكىندىك بەرەدى»، - دەدى ۇكىمەت باسشىسى.
ەكىنشىدەن ونىڭ ايتۋىنشا، مەديتسينا جۇمىسكەرلەرىنىڭ پراكتيكالىق دايارلىعىن كۇشەيتۋ ءۇشىن دەنساۋلىق ساقتاۋ مينيسترلىگى پراكتيكالىق دايارلىققا نازار اۋدارا وتىرىپ، حالىقارالىق ستاندارتتار بويىنشا وقىتۋدىڭ قازىرگى زامانعى باعدارلامالارىنا كوشۋ جونىندە ۇسىنىستار ەنگىزىپ، اكىمدىكتەرمەن بىرگە بيىل مەملەكەتتىك اۋرۋحانالاردى مەنشىكتى كلينيكالىق بازالار رەتىندە جوعارى وقۋ ورىندارىنا بەرۋ ماسەلەسىن پىسىقتاۋى ءتيىس.
«ءۇشىنشى، ەڭبەك جانە حالىقتى الەۋمەتتىك قورعاۋ مينيسترلىگى ۇلتتىق ەكونوميكا، قارجى، ءبىلىم جانە عىلىم مينيسترلىكتەرمەن بىرگە جۇمىس ىستەپ جۇرگەن ادامداردى ۇزدىكسىز وقىتۋ كەشەنى جۇيەسىن ىسكە قوسۋدى قامتاماسىز ەتسىن. جۇمىس بەرۋشىلەرمەن ىنتىماقتاسا وتىرىپ، سالىقتىق شەگەرىمدەردى كاسىپورىنداردىڭ پەرسونالداردى وقىتۋ شىعىندارىنا قولدانۋ مۇمكىندىگىن زەردەلەسىن. قايتا دايارلاۋ جانە بىلىكتىلىكتى جوعارلاتۋ كۋرستارىنا اقى تولەۋدىڭ ۆوۋچەرلىك نەگىزدەرىن قاراستىرسىن. ەلەكتروندى ەڭبەك بيرجاسىنىڭ نەگىزىندە كاسىپتىك داعدىعا وقىتاتىن، سونداي-اق قاجەتتى داعدىلاردى ۇيرەتەتىن جانە العان داعدىلاردى جۇمىس بەرۋشىلەر مويىندايتىنداي سەرتيفيكات بەرەتىن وقۋ كۋرستارىنىڭ اۋقىمدى تىزبەسى بار ۇلتتىق وقىتۋدىڭ ونلاين پورتالىن ىسكە قوسۋدى قامتاماسىز ەتسىن»، - دەدى پرەمەر-مينيستر.
