قازاقتىڭ تابيعي قۇرت-مايىنا سۇرانىس ارتىپ كەلەدى
اقتوبە وبلىسى، العا اۋدانى، بەستاماق اۋىلىنىڭ تۇرعىنى كۇن سايىن ءسۇت وڭدەپ وتىر. ياعني، ايران ۇيىتادى، قۇرت جاسايدى، قايماق شايقاپ، ماي دايىندايدى. جىل بويى ۇزدىكسىز ءسۇت قابىلدايتىن «ىقىلاس» اۋىل وندىرىستىك كووپەراتيۆى 2016-جىلدان بەرى تابىستى جۇمىس ىستەپ كەلەدى. تۇراقتى ساتىپ الۋشىلار مەن تاپسىرىس بەرۋشىلەرى بار.
«ۇلتتىق تاعامعا سۇرانىس وتە جوعارى. سيىر ساۋعان كەزدە ءسۇتتى الىپ كەتۋگە كەلىپ تۇرادى. ادامدار پاكەتتەگى، قوسپاسى بار سۇتتەن شارشاعان، تابيعي ءونىمدى ىزدەپ تۇرادى. سارىسۋ، ىشىمشىكتى دە الادى. ءسۇت قالدىقسىز ءونىم. تەك شىدام مەن ءتوزىم كەرەك. مايقۇرت تا ۇمتىلىپ بارادى. ونى ايران، ماي، قانتتان جاسايدى. مايقۇرتتى قايناتۋعا 5-6 ساعات كەرەك»، - دەيدى اينۇر جولماعامبەتوۆا.
ال ىرىمشىكتى قايناتۋ ءۇشىن 7-8 ساعات ۋاقىت جۇمسالادى. ال شارۋاشىلىق ايىنا 100-150 كەلى ىرىمشىك ساتىپ وتىر.
«مەن شارۋا قوجالىقتارىنان ءسۇت قابىلدايمىن. قازىر كۇنىنە 200 ليتر ءسۇت اكەلەدى. ال جازدا 3-4 تونناسىن قابىلدايمىز. سول كەزدە ءسۇتتى وڭدەپ، قۇرت، ماي، ىرىمشىك جاساپ، ساقتاپ قويامىز. توڭازىتقىشقا سالىپ، قىستا ساتۋعا شىعارامىز. ءبىز ءۇشىن قىس مەزگىلى وتە ءساتتى ۋاقىت. ءدال وسى شاقتا سۇرانىس جوعارى. باعا دا قىمبات ەمەس. بازار باعاسىنان ارزان. ءبىزدى ىزدەپ كەلەتىندەر، تاپسىرىس بەرەتىندەر كوپ»، - دەيدى كوپبالالى انا.
ول بۇل جۇمىستارعا ءوز بالالارىن دا ماشىقتاندىرعان. 7 بالانىڭ اناسى ۇل-قىزدارىن ۇلتتىق تاعام جاساۋعا ۇيرەتىپ ءجۇر. ال ىدىس جۋۋ ءۇشىن جۇمىسشىلار العان. بارلىعى 5 ادامدى جۇمىسپەن قامتاماسىز ەتىپ وتىر.
«قوسپاسى كوپ تاماق جەگەن ادامنىڭ دەنساۋلىعى سىر بەرەدى. شىنىن ايتقاندا، قازاق ءوزىنىڭ تابيعي قۇرت پەن مايىن قاتتى ساعىندى. سوندىقتان دا اۋىلعا قاراي بەت بۇرىپ، قولدان ءونىم الادى. بازاردا قايماقتىڭ بىرنەشە ءتۇرى بار، ءبىراق ءدامى باسقا، قۇنارى بولەك. 20-30 ليتر قايماق 10-20 مينۋتتا ساتىلىپ كەتەدى، تالاسىپ قالادى. كۇنىنە 150 ليتر ايرانعا دا سۇرانىس بار. ماسەلەن، ىرىمشىكتى مايەكتەن جاسايمىز. ال ءتاتتى ىرىمشىككە برىنزا جاساۋعا ارنالعان پەپسين قوسامىز»، - دەيدى كاسىپكەر.
قازىرگى كەزدە شارۋاشىلىق ءسۇت ونىمدەرىنىڭ 12 ءتۇرىن شىعارىپ وتىر. الداعى ۋاقىتتا اۋىل شارۋاشىلىق كووپەراتيۆى ءونىم كولەمىن ارتتىرماق.
