ا ق ش-تاعى قازاق بوكسشىسى جەكپە-جەگى الدىندا سالماق ولشەۋ راسىمىنەن ءوتتى
جانىبەك امەريكالىق ستيۆەن مارتينەسپەن (18-4, 13 ك و) كەزدەسەدى. ورتا سالماقتاعى ايقاس سەگىز راۋندقا ەسەپتەلگەن.
جەكپە-جەك الدىندا قارسىلاستار ءداستۇرلى سالماق ولشەۋ راسىمىنەن ءوتتى. ءالىمحان ۇلىنىڭ سالماعى 162 فۋنت، ال مارتينەستىڭ سالماعى 160,4 فۋنتتى قۇرادى. ءراسىم بارىسىندا تۇسىرىلگەن ۆيدەونى قازاقستاندىق بوكسشىنىڭ كومانداسى ينستاگرامدا جاريالادى.
ايتا كەتەيىك، بۇل كەشتىڭ باستى ايقاسى - كولۋمبيالىق سپورتشى ەلەيدەر الۆارەس پەن رەسەيلىك سەرگەي كوۆاليەۆ اراسىنداعى رەماتچ.
جانىبەك ءالىمحان ۇلى- ستيۆەن مارتينەس جەكپە- جەگىن «Qazsport» تەلەارناسى تىكەلەي ەفيردەن كورسەتەدى. باستالۋى 3 -اقپان، استانا ۋاقىتىمەن ساعات 07.30.
ەسكە سالا كەتەيىك، جانىبەك پروفي- رينگتەگى ءتورتىنشى ايقاسىن وتكەن جىلدىڭ قاراشا ايىندا «جىرتقىش» لاقاپ اتىمەن تانىمال امەريكالىق الەكساندر ۆونمەن وتكىزىپ، تورەشىلەر شەشىمىمەن جەڭىسكە جەتكەن ەدى.
بۇعان دەيىن بوكسشىمىز بەسىنشى جەكپە- جەگى الدىنداعى كوڭىل- كۇيىمەن ءبولىسىپ، جانكۇيەرلەرىنە العىس ايتقان بولاتىن.
«جانىبەك حان - قازاق حاندىعىنىڭ نەگىزىن قالاعان حانداردىڭ ءبىرى. ەڭسەلى ەل بولۋ جولىنداعى كەرەي مەن جانىبەكتىڭ ەڭبەگى تاريحتا التىن ارىپپەن جازۋلى. ۇلت ءۇشىن ولشەۋسىز ەڭبەك ەتتى. بىزگە دە ازان شاقىرىپ حان ەسىمى قويىلعان سوڭ، ءالسىز بولۋعا قاقىمىز جوق. بابالارداي ۇلى ءىس اتقارا الماساق تا، تۋدى قۇلاتپاي، نامىستى بەرمەي، جەڭىسپەن ەلدى قۋانتۋ - نەگىزگى مىندەتىم دەپ ەسەپتەيمىن. تاقىمقىسار اعايىنعا مىڭ العىس. مۇحيتتىڭ ارعى بەتىندە جانكۇيەرلىكتەرىڭىزدى سەزىنىپ ءجۇرمىن. بەسىنشى جەكپە- جەككە دە از كۇن قالدى. جەكسەنبىدە امەريكالىقتارعا قازاقتىڭ بوكس ءستيلىن كورسەتەمىز، بۇيىرتسا. جەڭىستە جۇزدەسەيىك. تۋ جەلبىرەسىن!»، - دەپ جازعان ەدى ول ينستاگرامدا.
