ولگا رىپاكوۆا ەل ازاماتتىعىن العان كەنيالىق سپورتشىلارعا قاتىستى پىكىر ءبىلدىردى
تانىمال سپورتشى ءوز پىكىرىن الەۋمەتتىك جەلىدە جاريالاعان.
رىپاكوۆا ءوز سوزىندە شەتەلدىك سپورتشىلاردىڭ وتاندىق جەڭىل اتلەتيكانىڭ دامۋىنا ۇلەس قوساتىنىن اتاپ وتكەن.
ايتا كەتەلىك، نورا دجەرۋتو، كارولين كيپكيرۋي، دەيزي دجەپكيمەي، شەدراكا كوەچا سىندى سپورتشىلار باپكەرى ءارى مەنەدجەرى كەننەت روتيچپەن بىرگە 2018 -جىلى قازاقستان ءتولقۇجاتىن العان ەدى.
«2018 -جىلدىڭ جەلتوقسانىندا كەنيالىق ءتورت سپورتشى مەن ولاردىڭ باپكەرى قازاقستان ازاماتتىعىن قابىلدادى. 2019 -جىلدىڭ قاڭتارىنان باستاپ اتالعان سپورتشىلار شىعىس قازاقستان وبلىسىنىڭ قۇراماسى مەن «التاي اتلەتيكس» كلۋبىنىڭ نامىسىن قورعايدى.
ەلىمىزدەگى جەڭىل اتلەتيكانىڭ دامۋىنا بەي-جاي قارامايتىندىقتان، كەنيالىق سپورتشىلاردىڭ كەلۋى وڭ اسەر بەرەتىنىن ايتقىم كەلەدى.
بۇل الەمدە بار تاجىريبە. قازاقستان ءۇشىن دە تاڭسىق ەمەس. ەلىمىزگە 2005 -جىلدان بەرى شەتەلدىك سپورتشىلار شاقىرىلۋدا.
قازاقستان تۋىنىڭ استىندا ونەر كورسەتەتىن كەنيا سپورتشىلارى الەمدىك جارىستاردا جۇلدەگە ىلىگىپ ءجۇر. وسىلايشا، ءبىز الەمدىك جەڭىل اتلەتيكادا ايتارلىقتاي يميدج قالىپتاستىرامىز.
كەنيالىق جەلاياقتار ءوز تاجىريبەلەرى مەن تەحنيكاسىن ءبىزدىڭ سپورتشىلارعا ۇيرەتىپ، جاستارعا جول كورسەتىنىنە، شەبەرلىك ساباقتارىن وتكىزەرىنە سەنىمىم مول. ودان بولەك، سپورتشىلار ىشكى بىرىنشىلىكتەگى باسەكەلەستىكتى ارتتىرا تۇسەدى.
سپورتشىلار ءوز ەرىكتەرىمەن قر ازاماتتىعىن قابىلدادى. جاقسى ناتيجە كورسەتۋگە تالپىنعان ادام رەتىندە مۇنداي ارىپتەستەرىم بارىنا قۋانامىن»، - دەيدى رىپاكوۆا.
