حان ەسىمىن يەلەنگەن سوڭ السىزدىككە قاقىم جوق: جانىبەك ءالىمحان ۇلى كەزەكتى جەكپە-جەگىنە دايىندالىپ جاتىر
«جانىبەك حان - قازاق حاندىعىنىڭ نەگىزىن قالاعان حانداردىڭ ءبىرى. ەڭسەلى ەل بولۋ جولىنداعى كەرەي مەن جانىبەكتىڭ ەڭبەگى تاريحتا التىن ارىپپەن جازۋلى. ۇلت ءۇشىن ولشەۋسىز ەڭبەك ەتتى. بىزگە دە ازان شاقىرىپ حان ەسىمى قويىلعان سوڭ، ءالسىز بولۋعا قاقىمىز جوق. بابالارداي ۇلى ءىس اتقارا الماساق تا، تۋدى قۇلاتپاي، نامىستى بەرمەي، جەڭىسپەن ەلدى قۋانتۋ - نەگىزگى مىندەتىم دەپ ەسەپتەيمىن. تاقىمقىسار اعايىنعا مىڭ العىس. مۇحيتتىڭ ارعى بەتىندە جانكۇيەرلىكتەرىڭىزدى سەزىنىپ ءجۇرمىن. بەسىنشى جەكپە-جەككە دە از كۇن قالدى. جەكسەنبىدە امەريكالىقتارعا قازاقتىڭ بوكس ءستيلىن كورسەتەمىز، بۇيىرتسا. جەڭىستە جۇزدەسەيىك. تۋ جەلبىرەسىن!»، - دەپ جازدى بوكسشى ينستاگرام پاراقشاسىندا.
ايتا كەتسەك، بۇعان دەيىن قازاقستاندىق سپورتشى 2- اقپان كۇنى امەريكانىڭ فريسكو قالاسىندا (تەحاس، ا ق ش) سەرگەي كوۆاليەۆ پەن ەلەيدەر الۆارەس ريەۆانشىنىڭ اندەركاردىندا جەكپە-جەك وتكىزەتىنىن حابارلاعان بولاتىن. BoxRec.com سايتىنىڭ مالىمەتىنشە، جانىبەكتىڭ بەسىنشى جەكپە-جەگىندەگى قارسىلاسى - ا ق ش وكىلى، The Hitman (جالدامالى كىسى ءولتىرۋشى) اتالىپ كەتكەن بوكسشى ستيۆەن مارتينەس (18-4، 13 ك و).
ەسكە سالا كەتەيىك، جانىبەك ءالىمحان ۇلى ءتورتىنشى جەكپە-جەگىن وتكەن جىلدىڭ قاراشا ايىندا امەريكالىق «جىرتقىش» لاقاپ اتتى الەكساندر ۆونمەن وتكىزىپ، تورەشىلەر شەشىمىمەن جەڭىسكە جەتكەن ەدى.
