قازاقستاندا تۇڭعىش رەت جاس ءوسپىرىمنىڭ اعزاسىنا يننوۆاتسيالىق يمپلانت ەنگىزىلدى
مۇنداي وپەراتسيا قازاقستاندا تۇڭعىش رەت جاسالدى، دەپ حابارلايدى قازاقپارات «حابار 24» تەلەارناسىنا سىلتەمە جاساپ.
17 جاستاعى ستۋدەنت جول اپاتى سالدارىنان 12 جىل بويى اۋزىن تولىق اشا الماي، قيىندىق كورگەن. وپەراتسيا ءساتتى ءوتتى. ەندى دارىگەرلەر بۇل تىڭ ءادىستى كەڭىنەن مەڭگەرىپ، ەلدىڭ بارلىق وڭىرىندە ەنگىزۋگە نيەتتى. سەبەبى، قازاقستاندا 40 قا جۋىق بالا وسىنداي ەمگە مۇقتاج. ال شەتەلدە مۇنداي وپەراتسيانىڭ قۇنى 50 مىڭ دوللاردان اسىپ جىعىلادى.
ستۋدەنت بالاعا وتاندىق دارىگەرلەر بۇعان دەيىن 3 رەت وپەراتسيا جاساعان. ءبىراق ناتيجە بولماعان. كەيىن دياس انا مەن بالا ورتالىعىنا جۇگىنگەن. جاس ءوسپىرىم قازىر ءوزىن جاقسى سەزىنەدى. اۋزىن تولىق اشىپ، وزدىگىنەن تاماقتانادى، ەمىن-ەركىن سويلەيدى. ءتىپتى، 8 كەلى سالماق قوسقان. دياستىڭ وڭ جاق سۇيەگىنە قازىر پروتەز سالىندى. ءبىراق ونى جاساۋ وڭايعا سوقپاعان. ماماندار جاس ءوسپىرىمنىڭ سۋرەتىن ارنايى كومپيۋتەرلىك باعدارلاماعا سالىپ، 3D كەسكىنىن جاساعان. سوسىن پروتەزدى شەتەلدەن ارنايى تاپسىرىسپەن الدىرتقان.
ال بۇرىن-سوڭدى بولماعان ەمدى ازىرگە ورتالىقتا، حيرۋرگ رۋسلان سيا-تۋن-چين عانا مەڭگەرگەن. ول ءۇشىن مامان رەسەيدە ارنايى ءبىلىمىن شىڭداعان. ارينە، بىلىكتى مامان جىل سايىن 180 نەن اسا وپەراتسيا جاساپ جۇرسە دە، مۇنداي كۇردەلى ەمدى العاش رەت قولدانعان. بەس ساعاتقا سوزىلعان وپەراتسياعا رۋسلاننان بولەك 7 مامان قاتىستى. ەم-دوم ءساتتى اياقتالدى.
«ارنايى پروتەز دايىنداماي، ستاندارتتى ءتۇرىن قولدانۋعا بولادى. ءبىراق تاجىريبە ونىڭ تيىمدىلىگى از ەكەنىن كورسەتىپ وتىر. ارينە، تيتاننان جاسالعان پروتەزدىڭ ورنىنا ادامنىڭ سان ەتى سۇيەگىن الىپ، جاعىنا سايكەستەندىرىپ قويۋعا بولادى. ءبىراق ۋاقىت وتە كەلە سۇيەك قۇرىلىسى 20-30 پايىزعا سورىلىپ، جاقتىڭ ۇزىندىعى مەن بيىكتىگىنە سايكەس كەلمەۋى مۇمكىن. سوندىقتان ءبىز بالاعا ارنايى وزىنە لايىقتاپ جاسالعان پروتەز سالدىق. بالا وسسە دە، پروتەزدىڭ ەشقانداي كەرى اسەرى بولمايدى»، - دەيدى جاق-بەت سۇيەگى حيرۋرگى رۋسلان سيا-تۋن-چين.
دارىگەرلەردىڭ ايتۋىنشا، مۇنداي وپەراتسيانى جاس ءوسپىرىم 15 جاستان اسقان كەزدە عانا جاساۋعا بولادى. سەبەبى، وعان دەيىن بالانىڭ جاق-بەت سۇيەگى ءوسىپ-جەتىلەدى. ال ەلىمىزدە مۇنداي ەم-دومعا مۇقتاج جاندار بارشىلىق. انا مەن بالا ورتالىعى ولارعا كومەك قولىن سوزۋعا دايىن.
«العان يمپلانتتىڭ باعاسى بار، 3D سالعان باعاسى بار. سوندا 2-3 ميلليون شىقتى. وزىمىزدە جاساساق وسىنشا اقشا. قازىر پروبلەما جوق. دارىگەرلەر كوردى. ءوز قولدارىنا سەنىپ، ءارى قاراي ونى دامىتسا، ەندى ۇكىمەتتىڭ كومەگى بولسا. دارىلەرى، شىعىن زاتتارى بولسا، ونى ىستەيدى»، - انا مەن بالا ورتالىعى ديرەكتورىنىڭ ورىنباسارى شولپان التىنوۆا.
