بيىل قازاقستان تولىقتاي ءوزىنىڭ بەنزينى مەن ديزەل وتىنىن تۇتىنادى - ۇكىمەت
بۇگىن ۇكىمەتتىڭ كەڭەيتىلگەن قۇرامداعى وتىرىسىندا ق ر پرەمەر-ءمينيسترىنىڭ ورىنباسارى ەربولات دوسايەۆ وسىلاي ءمالىم ەتتى، دەپ حابارلايدى قازاقپارات.
ونىڭ سوزىنە قاراعاندا، ەكونوميكالىق ءوسىمنىڭ درايۆەرى رەتىندە وتىن-ەنەرگەتيكالىق كەشەن ساقتالىپ وتىر. 2018-جىلى وسى سەكتور نەگىزگى كورسەتكىشتەر بويىنشا رەكوردتى بولدى.
«90 ميلليون توننادان استام مۇناي مەن 55 ميلليارد تەكشە مەتردەن استام گاز ءوندىرىلدى. مۇناي وڭدەيتىن بارلىق ءۇش زاۋىتتى جاڭعىرتۋ جۇمىستارى اياقتالدى. وتكەن جىلدىڭ قورىتىندىسى بويىنشا نەگىزگى مۇناي ونىمدەرىنە بولشەك باعا ءوسىمى بايقالعان جوق. بيىلدان باستاپ بەنزين، ديزەل وتىنى، اۆياكەروسين مەن بيتۋمگە ىشكى قاجەتتىلىك قامتاماسىز ەتىلەدى»، - دەدى ە. دوسايەۆ.
سونىمەن قاتار ول وتكەن جىلدىڭ قورىتىندىسى بويىنشا ىشكى جالپى ءونىمنىڭ ءوسىم 4,1 پايىزدى قۇراعانىن، ال وسى ءوسىمنىڭ 70 پايىزى شيكىزاتتىق ەمەس سەكتوردىڭ ەسەبىنەن قامتاماسىز ەتىلگەنىن ەسكە سالدى.
