الماتىدا بالالارىن قىتايعا وقۋعا جىبەرەمىز دەپ الدانعان تۇرعىندار شۋ شىعاردى
ونداعىلار بىلتىر الپىسقا جۋىق تالاپكەردەن اسپان ەلىنىڭ ءۇش بىردەي قالاسىنا اپارىپ، ۋنيۆەرسيتەتكە ورنالاستىرۋ ءۇشىن قوماقتى قارجى الىپتى. ءبىراق، اقشا اۋدارىلماق تۇگىلى، ول ءبىلىم وردالارى بۇل كومپانيانى بىلمەيمىز دەپ شىعارىپ سالعان. ءسويتىپ، قازاقستاندىقتاردىڭ كوبى دالادا قالعان ەدى. ەندى جيعان تەرگەنىن وقۋعا بەرىپ، جەر سيپاپ قالعان جۇرت ءوز اقشالارىن قايتارۋدى تالاپ ەتۋدە.
اقشالارىن كۇتىپ، فيرمانىڭ بەرگەن ۋادەسىنە ابدەن تويعان تۇرعىندار كەڭسەگە باسا كوكتەپ كىرۋگە ءماجبۇر بولدى. ويتكەنى، جاپپاي پوليتسەيلەرگە ارىز جازعانىمەن كومپانيا ءالى جۇمىسىن توقتاتپادى، دەيدى. وزدەرى سەكىلدى تاعى تالاپكەرلەر الدانىپ قالادى دەپ قورقادى. گۇلدەن ەسىم قىزى جيەنىن وقۋعا جىبەرىپ وپىق جەگەندەردىڭ ءبىرى. التى ايدان بەرى 490 مىڭ تەڭگەسىنىڭ تەڭ جارتىسىن الا الماي ءجۇر، دەپ حابارلايدى «ەۋرازيا ءبىرىنشى ارناسى».
«سودان ارتىق سۇراپ تۇرعانىم جوق. اناۋ شىعىندالعان. مەنىڭ ارى بەرى جۇرگەنىمدى ساناپ وتىرعانىم جوق»، - دەيدى تۇرعىن گۇلدەن ەسىم قىزى.
فيرمانىڭ قىزمەتىنە يمانداي سەنگەن تاعى الپىستان استام ادام بار. ەلىمىزدىڭ تۇپكىر تۇپكىرىندە تۇراتىن جۇرت بالالارى جاقسى ءبىلىم الۋ ءۇشىن ميلليونداپ بەرگەن. كەلىسىم-شارتقا دا وتىرعان. قاعازدا اەروپورتتان كۇتىپ الادى، جاتاقحانا بەرىلەدى، ءتىپتى گرانت بولىنەدى دەپ كورسەتىلىپتى. الايدا، شەتەلگە جەتكەندە ءبارى باسقاشا بولعان.
«ۇلىم مەن كەلىنىمدى وسى فيرما ارقىلى قىتايعا وقۋعا جىبەردىم. 795 مىڭدى ساناپ بەردىك. ولار ۆيزا جاساپ بەرگەنىمەن، ەشكىم ۇشاقتان كۇتىپ الماعان. جاتاقحانانى ايتپاعاندا، ۋنيۆەرسيتەت بۇل كومپانيانى بىلمەيتىن بولىپ شىقتى. ءبىر كۇندە دالادا قالىپ، قوناق ءۇي ىزدەدى. ەندى بار اقشامىزدى بەرمەي وتىر»، - دەيدى تۇرعىن نۇربەك بولاتجان.
ياعني تالاپكەرلەر الدانعانىن تەك قىتايداعى گۋانجۋ، نانين قالالارىنا بارعانىندا تۇسىنگەن. ايتەۋىر ەلشىلىكتەگىلەر ۋنيۆەرسيتەت باسشىلىعىنا شىعىپ، بارلىعى ارەڭ دەگەندە ستۋدەنت اتانىپتى. تەك، سان سوقتىرعان فيرما ءالى كۇنگە دەيىن اقشالارىن قايتارماعانىنا اشۋلى. ءبىراق، كومپانيا وكىلدەرى ەلشىلىكتىڭ كومەگىمەن ءبىلىم ورداسىنا وقۋعا تۇسكەندەرىن مويىنداعانىمەن، سۇحبات بەرۋدەن باس تارتتى.
«ءبارىن بۇلاي ەمەس، كەلىسىپ جاسايمىز. جارايدى ما؟ ءسىزدى بۇگىن شاقىرا الامىن»، - دەيدى كومپانيا وكىلى دميتري كرەمنيەۆ.
سول بويى كومپانيا وكىلدەرى رەسمي سۇحباتتان باس تارتتى. ال ءتارتىپ ساقشىلارى «الاياقتىق» فاكتىسى بويىنشا ءىس قوزعاعاندارىن ايتادى. العاشىندا 20 ادام ارىزدانىپتى.
«قازىرگى تاڭدا 11 ىسكە تەرگەۋ جالعاسىپ جاتىر. ءتيىستى ساراپتامالار تاعايىندالىپ، ناتيجەسىندە، ءىستىڭ سوڭىندا ءتيىستى پروتسەسۋالدىق شەشىم قابىلداناتىن بولادى»، - دەيدى قالالىق پوليتسيا دەپارتامەنتىنىڭ رەسمي وكىلى سالتانات ازىربەك.
جۇرتتىڭ ءبىر عانا تۇسىنبەيتىنى ءار تالاپكەردەن كەم دەگەندە جارتى ميلليون تەڭگەدەن جيناپ العان كومپانيا ءالى جۇمىسىن توقتاتپاعانى. ايتپەسە، پوليتسيا دەپارتامەنتىندە ارىز جاتىر. تەكسەرىس جۇرگىزىلۋدە. وندا كۇيگەن اقشا كۇيسىن، تەك بولاشاق تۇلەكتەردىڭ الدانىپ قالماۋىنا ىقپال ەتسە، دەيدى.
