ديماشتىڭ استاناداعى كونسەرتىندە الەمدىك شوۋلارداعى تەحنولوگيالار پايدالانىلادى
«ادەتتە، ءبىز ۇلكەن شارالاردى جوسپارلاساق، ۋاقىت تاقاعان كەزدە جاريالاپ، ۇيىمداستىرىپ جاتامىز. ءبىراق، بۇل جولى ارنايى ۇزاق مەرزىمدى دايىندىقتى الىپ، تىرىسىپ جاتىرمىز. بىزدە تالقىلاۋدىڭ ءوزى ءبىر-ەكى اي مەرزىمدى الدى. سوندىقتان، بۇل جولعى كونسەرتكە ۇلكەن دايىندىقپەن كەلگىمىز كەلەدى. قازىر بىرنەشە شىعارماشىلىق توپپەن جۇمىس ىستەپ، ءارتۇرلى ۇسىنىستاردى قابىلداپ جاتىرمىز. مۇمكىندىگىنشە، بۇل كونسەرتتە الەمدەگى شوۋ-كونسەرتتەردە قولدانىلاتىن ءتۇرلى تاسىلدەر مەن جاڭا تەحنولوگيالاردى پايدالانامىز. سەبەبى، استانادا وتكىزىلەتىن كونسەرت - ەڭ الدىمەن ديماشتىڭ ءوز حالقىنا، ءوز تىڭداۋشىلارىنا ارنالماق»، - دەدى ەرلان قارين و ك ق- دا وتكەن باسپا ءسوز ءماسليحاتىندا.
ەرلان قارين ءوز سوزىندە، بۇل كونسەرتكە شەتەلدەن وتە كوپ قوناق كەلەدى دەپ كۇتىلىپ وتىرعانىن ايتىپ ءوتتى.
«وزدەرىڭىز بىلەتىندەي، ديماش الەمگە ايگىلى تانىمال جۇلدىز بولعاننان كەيىن ءانشىنىڭ كوپتەگەن ەلدە فاناتتارى بار. ءبىزدىڭ مىسالى بۇگىنگى ءماسليحاتىن ۇيىمداستىرىپ وتىرعانىمىزدىڭ تاعى ءبىر سەبەبى - وسى ۋاقىتقا دەيىن قايتا-قايتا سۇراقتار كەلىپ تۇسكەن بولاتىن. ەلدەگى ديماشتىڭ قولداۋشىلارمەن بىرگە شەتەلدە تۇراتىن ازاماتتاردان «كونسەرت قاي كەزدە بولادى؟ ءبىز الدىن الا جوسپارلاساق دەيمىز. الاتىن بيلەتتەردى الىپ، قامدانۋىمىز كەرەك» دەگەن سىڭايداعى مىڭداعان سۇراق كەلىپ، قايتا-قايتا تۇسكەننەن كەيىن ديماشتىڭ كونسەرتى تۋرالى جاريالى حابارلاۋ كەرەك دەپ شەشتىك»، - دەدى ەرلان قارين.
ەسكە سالا كەتسەك، بۇعان دەيىن و ك ق- دا وتكەن باسپا ءسوز ءماسليحاتىندا ديماش قۇدايبەرگەن جاستار جىلى اياسىندا استانادا كونسەرت بەرەتىنىن حابارلاعان بولاتىنبىز.
