ا ق ش نيكولاس مادۋرو بيلىگىنە ەسكەرتۋ جاسادى
بۇل جايىندا ا ق ش پرەزيدەنتىنىڭ ۇلتتىق قاۋىپسىزدىك بويىنشا كەڭەسشىسى دجون بولتون Twitter- دە جازدى. ول سونىمەن قاتار كۋبانىڭ مادۋرونىڭ قارۋلى جاقتاستارىنا قولداۋ كورسەتىپ وتىرعانىن دا ايتتى. ا ق ش مادۋرونى ۆەنەسۋەلانىڭ زاڭدى پرەزيدەنتى دەپ تانۋدان باس تارتىپ، حۋان گۋايدونى ەلدىڭ زاڭدى باسشىسى دەپ مويىنداعان.
نيكولاس مادۋرو 27 - قاڭتاردا بۇعان دەيىن امەريكالىق ديپلوماتتارعا قويعان ەلدەن كەتۋ تۋرالى تالابىنان باس تارتپايتىنىن مالىمدەگەن. گۋايدو 23 - قاڭتاردا وتكەن ميتينگىدە ءوزىن پرەزيدەنتپىن دەپ جاريالاعان. ول مادۋرو جەڭىسكە جەتكەن سايلاۋ زاڭدى بولماعاندىقتان، كونستيتۋتسيا بويىنشا پرەزيدەنت بولۋعا قۇقىعىم بار دەپ سانايدى. ا ق ش پەن لاتىن امەريكاسى ەلدەرىنىڭ كوبى گۋايدونى ۋاقىتشا پرەزيدەنت دەپ تانىعان. ەۋروپا وداعى ەلدەرى مادۋرو ەگەر جەدەل تۇردە مەرزىمىنەن بۇرىن سايلاۋ وتەتىنىن جاريالاماسا گۋايدونى زاڭدى پرەزيدەنت دەپ تانيتىنىن مالىمدەگەن. رەسەي، تۇركيا، كۋبا مەن تاعى بىرنەشە ەل مادۋرونى پرەزيدەنت دەپ تانيدى.
ۆەنەسۋەلادا حالىق بىرنەشە كۇن كوشەگە شىعىپ، بيلىككە قارسىلىق اكسيالارىن وتكىزىپ كەلەدى. دەگەنمەن، سوڭعى كۇندەرى اكسياعا قاتىساتىندار سانى ايتىرلىقتاي ازايىپ قالعان. وپپوزيتسيا الداعى كۇندەرى اۋقىمدى قارسىلىق شەرۋلەرىن وتكىزۋدى جوسپارلاپ وتىر. سوڭعى كۇندەرى جۇزدەگەن بەلسەندى ۇستالعاندىقتان، گۋايدونىڭ جاقتاستارى بيلىك وزدەرىن قۋعىنداۋى مۇمكىن دەپ قاۋىپتەنەدى.
رەسەي پرەزيدەنتى ۆلاديمير پۋتيننىڭ باسپا ءسوز حاتشىسى دميتري پەسكوۆ 27 - قاڭتاردا رەسەي ۆەنەسۋەلاعا مادۋرونى قورعاۋعا جالدامالىلار جىبەرمەگەنىن مالىمدەگەن. 25 - قاڭتاردا Reuters اگەنتتىگى ءوز دەرەككوزدەرىنە سىلتەمە جاساپ، كاراكاسقا جەكە اسكەري كومپانيانىڭ ساربازدارى جىبەرىلگەنىن حابارلاعان. Reuters بۇل ساربازدار كرەملمەن بايلانىسى بار «ۆاگنەر» جەكە اسكەري كومپانياسىنىڭ جاساقتارى بولۋى مۇمكىن ەكەنىن ايتادى. «ۆاگنەر» جاساقتارى سيريا مەن ۋكرايناداعى قاقتىعىستارعا قاتىسقان.
ۆەنەسۋەلا ارمياسىنىڭ قولباسشىلارى مادۋروعا ادال ەكەنىن مالىمدەگەن. مادۋرو 27 - قاڭتاردا اسكەري بولىمدەردىڭ بىرىنە بارعان. الايدا، ۆەنەسۋەلانىڭ ا ق ش- تاعى اسكەري اتتاشەسى گۋايدونى پرەزيدەنت دەپ تانيتىنىن مالىمدەگەن.
ريم پاپاسى فرانسيسك كەشە پاناماعا ساپارىندا ۆەنەسۋەلاداعى داعدارىستى «ءادىل جانە بەيبىت» تۇردە رەتتەۋگە شاقىرعان.
www.azattyq.org
