سادريددين احمەدوۆ: جەڭىسىمدى حالقىمنىڭ كوز جاسىنا ارنايمىن
«اسسالامۋاعالەيكۋم قازاق ەلى! بۇگىن اللانىڭ قالاۋىمەن، ءوز حالقىمنىڭ قولداۋىمەن الەمدىك بوكستاعى WBC نۇسقاسى بويىنشا الەم چەمپيونى اتاعىنا قول جەتكىزدىك. سىزدەردىڭ ماعان دەگەن دۇعالارىڭىزعا، قولداۋلارىڭىزعا العىسىم شەكسىز. ەڭ ءبىرىنشى ەلىمىز تىنىش، حالقىمىز امان بولسىن. 2018-جىل قازاق ەلىنە وتە اۋىر جىلداردىڭ ءبىرى بولدى. قوعام قايراتكەرى، جازۋشى شەرحان مۇرتازا اتامىزدىڭ، قازاقتىڭ ماڭدايىندا بىتكەن جارقىراعان جۇلدىزى، پاتريوتى دەنيس باۋىرىمىزدىڭ ومىردەن ءوتۋى ەلىمىز ءۇشىن اۋىر سوققى بولسا، گەننادي اعامىزدىڭ ءبىز كۇتپەگەن جەردەن جەڭىلۋى قانشاما قازاق جانكۇيەرلەرىن جىلاتتى»، - دەپ جازدى س. احمەدوۆ ءوزىنىڭ فەيسبۋك پاراقشاسىنا.
سپورتشى ومىردەن وزعان ايتۋلى تۇلعالاردىڭ ورنىن ەش امال تولتىرا المايتىنىن ايتا كەلە، بوكستاعى كەزەكتى جەڭىسىن سولاردىڭ قۇرمەتىنە ارنادى.
«بۇل جەڭىسىمىزدى سول كىسىلەردىڭ ومىردەن وزۋى، گەننادي اعامىزدىڭ جەڭىلۋى جانە ەلىمىزدە وزگە دە ورىن العان قايعىلى وقيعادان سوڭعى قازاق حالقىنىڭ كوز جاسىنا ارنايمىن. ەلىمىزدىڭ بولاشاعىنا الاڭدايتىن قازاق جاستارىمىز، اعالارىمىز باردا، ول كىسىلەردىڭ ەلىمىزگە ارناعان ەڭبەگى زايا كەتپەدى دەپ ايتا الامىن»، - دەدى ول.
سونىمەن قاتار، بوكسشى ۇستىمىزدەگى جىلدىڭ جاستار جىلى بولىپ بەكىتىلگەنىن ايتا كەلە، ءوز زامانداستارىنا ۇلكەن جاۋاپكەرشىلىك جۇكتەلگەنىن ەسكەرىپ، جاستاردى ءبىلىم الۋ مەن ەلىمىزدىڭ دامۋىنا ۇلەس قوسۋعا شاقىردى.
ايتا كەتسەك، وتانداسىمىز بۇگىن كانادانىڭ مونرەال قالاسىندا وتكەن بوسكتاعى كەزەكشى جەكپە-جەگىندە مەكسيكا بوكسشىسى ابراحام حۋارەستى (13-2، 5 ك و) 4- راۋندتا ۋاقىتىنان بۇرىن جەڭىپ، WBC نۇسقاسى بويىنشا جاستار اراسىندا ءبىرىنشى ورتا سالماقتا الەم چەمپيونى اتاندى.
