جاستار جىلى: اۋىلدا ات سپورتىن دامىتۋ قاجەت
ونىڭ ايتۋىنشا، جۋىردا استانادا ەلباسىنىڭ قاتىسۋىمەن وتكەن جاستار جىلىنىڭ اشىلۋ سالتاناتىندا جەتكىنشەك ۇرپاقتى سپورت پەن تۋريزمگە كەڭىنەن تارتىپ، رەسپۋبليكالىق چەمپيوناتتار وتكىزۋ ماسەلەلەرى ءسوز بولدى. «مەن ينفورماتيكا ماماندىعىن مەڭگەرىپ، «ديپلوممەن اۋىلعا» باعدارلاماسى بويىنشا اۋىلعا كەلىپ، ۇستازدىق قىزمەت اتقارىپ كەلەمىن. شاكىرتتەرىمدى ءبىلىم مەن ونەردىڭ ءتۇر- تۇرىنە باۋليمىن. ءوزىم دە سپورتتىڭ بوكس (1 رازرياد) ، كۇرەس، باسكەتبول، توعىزقۇمالاق، ۇستەل تەننيسى تۇرلەرىمەن اينالىسامىن. قازىرگى كەزدە اۋداندىق مەكتەپتەن تىس جۇمىستار ورتالىعىنىڭ باسشىسى رەتىندە بالالاردىڭ شىعارماشىلىق ەڭبەكپەن شۇعىلدانۋىنا، وسى باستان سالاۋاتتى ءومىر سۇرۋگە داعدىلانىپ، بوس ۋاقىتتارىن ماعىنالى وتكىزۋىنە باسا نازار اۋدارامىن. ارينە، سپورت تا ۇمىت قالماق ەمەس. وسى ورايدا بالالار جاستايىنان اتقا ءمىنىپ، جىلقىعا جاقىن وسسە، وزدەرى ءۇشىن پايدالى دەپ ويلايمىن. باسقاسىن ايتپاعاندا، اتپەن سەرۋەندەۋدىڭ ءوزى ەم. سونىمەن قاتار اۋىلداردا ات سپورتى تۇرلەرىن دامىتۋدى قولعا السا، ءدۇبىرلى دودالاردا توپ جاراتىن تالانتتار شىعار ەدى» ، - دەيدى جاس مامان.
اتقا ءمىنۋ مادەنيەتىنىڭ ەرتەدەن باستالعانى جونىندە ەلباسىنىڭ «ۇلى دالانىڭ جەتى قىرى» اتتى باعدارلامالىق ماقالاسىندا ايتىلعانى ءمالىم. «جىلقى مالى قازاق حالقىنىڭ ومىرىمەن ءبىر جاساسىپ كەلە جاتقان جانۋار دەسەك، قاتەلەسپەيمىز. اتقا ءمىنۋ، ونى باپتاۋ تۋرالى ماقالادا جاقسى تۇجىرىم جاسالعان. اقىن قادىر مىرزا ءاليدىڭ: «اتقا دەگەن قۇمارلىعى حالقىمنىڭ، ماشيناعا كوشسە كەرەك بۇگىندە» دەگەن ولەڭ جولدارىندا ايتىلعانداي، بۇگىندە اتقا قۇمارلىقتى، باپتاۋدى السىرەتىپ العانىمىز انىق.
مۇحتار اۋەزوۆ: «بايگە اتتىڭ ءمۇسىنىن سىناپ، سيپاتتاۋدا اباي ۇلكەن بىلىمدىلىك، بايقاعىشتىق تانىتادى. ول ءارى شەبەر اقىن بولۋدىڭ ۇستىنە اسا بىلگىر، ساياتشى، اتسەيىس سىنشى» ، - دەگەنىندەي، اباي - جۇيرىك اتتىڭ ءتۇر سيپاتىن جازىپ كەتكەن بىردەن- ءبىر عۇلاما. ابايدىڭ «اتتىڭ سىنى» ولەڭىندە جۇيرىك اتتىڭ قالاي بولاتىنى سيپاتتالعان. «اتىڭ جاقسى بولسا، ءتىرى دۇنيەنىڭ شۋاعى، بالاڭ جاقسى بولسا، ەكى كوزىڭنىڭ شىراعى» ، دەگەندەي، ءار قازاق اتقا ءمىنۋدى، قولدانۋدى، قىر- سىرىن ءبىلۋى ءتيىس دەپ بىلەمىن.
«جانىنا ەلىمىزدىڭ جىلقى جاققان، جىلقىعا جەتپەگەن كوز جاۋتاڭ قاققان. مىنسەڭ - ات، ىشسەڭ - قىمىز، جەسەڭ - قازى، قاشاننان قازاق حالقى جىلقى باققان» ، - دەپ، ءىلياس جانسۇگىروۆ جىرلاعانداي، ۇلى دالا جىلقىسىنىڭ داڭقى جارقىرايتىن كەزەڭ تۋدى دەپ ەسەپتەيمىن. اتقا مىنگەن قازاقتىڭ رۋحى مىقتى بولادى. ەندەشە، ۇلتتىق رۋحىمىزعا ساي بولىپ، جاستار جىلىندا عانا ەمەس، ودان كەيىن دە ايانباي ەڭبەك ەتىپ، الدىڭعى شەپتەن تابىلىپ، ەلىمىزدىڭ دامۋىنا جاستىق جالىنمەن ۇلەس قوسۋ - ءبىزدىڭ دە باستى مىندەتىمىز دەپ بىلەمىن» ، - دەپ تۇيىندەدى ءسوزىن ن. ميزامبايەۆ.
