جاس كاسىپكەر ەلدە جوق كاسىپ - شينشيللا وسىرۋمەن اينالىسادى
ەلىمىزدە تەڭدەسى جوق فەرما اشقان جاس كاسىپكەر باعاسى قىمبات جانۋاردىڭ سانىن ءبىر جىلدا 150 گە جەتكىزدى، دەپ حابارلايدى قازاقپارات ءتىلشىسى.
مەملەكەت كاسىپ اشۋدى نيەت ەتكەندەرگە قولداۋ رەتىندە جەڭىلدەتىلگەن نەسيە مەن دەمەۋقارجى ۇسىنىپ قانا قويماي، تىڭ يدەيالارى بار ازاماتتارعا قايتارىلمايتىن گرانت تا بەرەدى. وسىنداي مۇمكىندىكتى پايدالانىپ، ەلىمىزدە بۇرىن- سوڭدى بولماعان كاسىپ اشقانداردىڭ ءبىرى - ەسىل اۋدانىنىڭ تۇرعىنى ەۆگەني شمالكو. شينشيللا فەرماسىن اشۋ يدەياسى ءۇشىن جاس كاسىپكەر مەملەكەتتەن بىلتىر 3 ميلليون تەڭگە گرانت ۇتىپ الدى.
«بۇعان دەيىن مەن سازقۇندىز بەن قويان ءوسىرىپ كورگەم. تاجىريبەم بار. عالامتوردى اقتارىپ، وسى شينشيللانى ءوسىرۋ تۋرالى اقپاراتتى كوردىم. اڭ شارۋاشىلىعىمەن كوپشىلىك اينالىسا بەرمەيدى. ەلىمىزدە جانۋاردىڭ بۇل ءتۇرىن وسىرەدى دەگەندى ەستىمەپپىن. نەگىزگى قاراجات اڭداردى ساتىپ الۋعا جانە جەتكىزۋگە جۇمسالادى. ولاردى ۇستايتىن تور دا قىمبات. ويتكەنى ارنايى جاسالعان، وسى جانۋارلارعا نەگىزدەلگەن بولۋى كەرەك. ەسەسىنە كەيىن ءوسىرۋ بارىسىندا ايتارلىقتاي قيىندىقتار تۋىندامايدى. قورەگى - قاراپايىم، قويان سياقتى تاماقتانادى. ياعني شىعىندى كوپ قاجەت ەتپەيدى. ءبىر جىلدا ەكى رەت بالالاپ، 5-6 ۇرپاق اكەلۋى مۇمكىن» ، - دەيدى جاس كاسىپكەر.
شينشيللا - وڭتۇستىك امەريكانى مەكەندەيتىن كەمىرگىشتەردىڭ ءبىر ءتۇرى. تەرىسى وتە جۇمساق جانە ادەمى كەلەدى. ءبىر ەرەكشەلىگى، ونىڭ ءجۇنى ور قوياندىكىنەن 75 ەسە قالىڭ. ياعني جىلۋدى دا 75 ەسە جاقسى ساقتايدى. وسى قاسيەتىنىڭ ارقاسىندا سالماعى ءبىر كەلىدەن اسپايتىن بۇل جانۋارلار جوعارى باعالانادى. ەۆگەني 50 شينشيللانى رەسەيدەن ءارقايسىسىن 50 مىڭ تەڭگەدەن ساتىپ اكەلىپتى. بۇگىندە شاعىن فەرمادا 150 جانۋار بار، ونىڭ جارتىسى - انالىق شينشيللا. كاسىپكەردىڭ ايتۋىنشا، ونىڭ شينشيللالارى «بورتە ستاندارت» دەپ اتالاتىن اسىل تۇقىمدىلارعا جاتادى. ونى راستايتىن ارنايى ءتولقۇجاتى دا بار ەكەن. اڭداردى باعالى تەرىسى ءۇشىن وسىرگەنىمەن، ازىرگە سانىن ارتتىرماقشى. بىرەر كۇن بۇرىن ومبى قالاسىنان اسىل تۇقىمدى اقشىل قىزىل جانە «موزايكا» اتتى ەكى ءتۇرىن ساتىپ اكەلىپتى. « ءونىمدى وتكىزۋدە ماسەلە تۋىندامايدى. مەن ولاردى شينشيللا ءوسىرۋدى نيەت ەتكەندەرگە تىرىدەي ساتامىن. كەيىن سانىن ارتتىرعان سوڭ عانا تەرىسىن وڭدەۋمەن اينالىسپاقپىن. قازىر ەكى باعدارلاما بويىنشا جۇمىس ىستەپ جاتىرمىن. ماسەلەن، شارۋاشىلىقتار 3-7-ايلىق اڭنىڭ ءارقايسىسىن 20 مىڭ تەڭگەگە، ال 7-18-ايلىق شينشيللالاردى 25 مىڭ تەڭگەگە ساتىپ الادى. سونداي- اق، ارىپتەستىك باعدارلاماسى بار. مەنىمەن كەلىسىمشارت جاساپ شينشيللانى جالعا الادى. ياعني مەن ءوسىرىپ، كوبەيتىپ بەرەمىن» ، - دەيدى ەۆگەنيي شمالكو.
26 جاستاعى ەۆگەنيدىڭ نەگىزگى ماماندىعى - ەكونوميست، زاڭگەر. وبلىستا اڭ شارۋاشىلىعىن دامىتۋدى ماقسات ەتكەن ول بولاشاقتا سويۋ تسەحى مەن تەرىدەن دايىن ءونىم شىعاراتىن تىگىن تسەحىن اشپاقشى. الايدا ول ءۇشىن جانۋارلار سانىن كەمىندە 500 گە جەتكىزۋى كەرەك.
