ەڭ جاس كوپ بالالى انا جازيرا تۇرعىنوۆانىڭ وتباسى جاڭا ۇيگە قونىستاندى
ابىلدابەكوۆتەر جانۇياسىنا بەرىلگەن باسپانا لەڭگىر قالاسىندا ورنالاسقان. ءتورت بولمەلى تۇرعىن ءۇيدىڭ ءىشى قاجەتتى جيھازعا تولتىرىلعان. وندا جاتىن جانە بالالار بولمەلەرى، اسحانا جانە قوناق كۇتەتىن بولمەلەر بار. مۇنداي باسپاناعا قول جەتكىزەمىز دەپ ويلاماعان جازيرا تۇرعىنوۆا ەلباسى مەن بيلىك وكىلدەرىنە ريزاشىلىعىن جەتكىزىپ، دەمەۋشىلىك جاساعان ازاماتتارعا العىسىن ايتتى.
«قۋانىشىمىزدا شەك جوق، مۇنداي باسپاناعا يە بولامىز دەپ ەشقاشان ويلاعان ەمەسپىز. بارلىعى تەز- تەز بولىپ كەتتى. وتاعاسى ەكەۋمىزدىڭ ۇيلەنگەنىمىزگە 12 جىل بولدى. وسى ۋاقىت ارالىعىندا ەكەۋمىمىز ءبىر- بىرىمىزگە دەمەۋ بولىپ، 7 بالا تاربيەلەپ وتىرمىز. اتا- ەنەم مەن اكە- شەشەم بار، سول كىسىلەر بىزگە كوپ قولداۋ كورسەتتى» ، - دەدى جەتى بالانىڭ اناسى.
تولەبي اۋدانىنىڭ اكىمى باۋىرجان وماربەكوۆتىڭ ايتۋىنشا، ەلىمىزدەگى ەڭ جاس انا بولاشاقتا ارنايى باعدارلامامەن وقىتىلماق.
«ءبىز وتباسى مۇشەلەرىمەن سويلەسكەن كەزدە ولار تولەبي اۋدانىنىڭ ورتالىعىندا تۇرعىلارى كەلەتىنىن جەتكىزدى. ەندىگى كەزەكتە كوپ بالالى وتباسىنىڭ ءوز شاڭىراعى بار. سونداي- اق وتاعاسى مەن ونىڭ كەلىنشەگىنىڭ مەملەكەتتىك باعدارلامامەن وقۋ كۋرستارىنان ءوتىپ، كەلەشەكتە جاقسى جۇمىسقا تۇرۋىنا مۇمكىندىك جاسايتىن بولامىز» ، - دەدى اۋدان اكىمى.
ايتا كەتەيىك، بۇعان دەيىن ەلىمىزدەگى ەڭ جاس كوپ بالالى انا جازيرا تۇرعىنوۆا شىمكەنتتىڭ ىرگەسىندەگى جۇلدىز ەلدىمەكەنىندە پاتەر جالداپ تۇرىپ جاتقانى تۋرالى جازعان بولاتىنبىز. ەرلى- زايىپتىلار جەتى بالالى بولۋىنا قاراماستان، تۇراقتى جۇمىستارى جوق ەكەنى دە جەتكىزىلگەن. ارتىنشا جازيرا تۇرعىنوۆا جاستار جىلىنا وراي ەلباسىمەن كەزدەسىپ، ءوزى سياقتى جاستاردى كوپبالالى بولۋدان قورىقپاۋعا شاقىردى. ال، بۇگىن تۇركىستان وبلىسىنىڭ اكىمى جانسەيىت تۇيمەبايەۆ كوپبالالى وتباسى مۇشەلەرىن قابىلداپ، ولارعا باسپانانىڭ كىلتىن تابىستاعان بولاتىن.
