قۇمار ويىندارىنان كەلەتىن قاۋىپ قانداي؟
بۇگىن استاناداعى «نۇر وتان» پارتياسى عيماراتىندا قازاقستانداعى قۇمار ويىندارى ماسەلەسى مەن ونى شەشۋ جولدارى تاقىرىبىنا قاتىستى اشىق ديالوگ قۇرىلدى.
«وسى كەزدە ويىن بيزنەسى ماسەلەلەرى بويىنشا زاڭنامالىق اكتىلەرگە وزگەرتۋلەر ەنگىزۋ كوزدەلىپ وتىر. وسى تۇرعىدا پارلامەنت ماجىلىسىندەگى پارتيا فراكتسياسى ارقىلى زاڭ جوباسىن كۇشەيتۋگە نيەتتىمىز. ءبىز بۇگىن جوعارىدا ايتىلعان ماسەلەنى تالقىلاۋعا ءارتۇرلى سالا ماماندارىن شاقىردىق. شارا ناتيجەسىندە مۇددەلى تاراپتاردىڭ پىكىرلەرى مەن ۇسىنىستارى جەكە-جەكە قارالاتىن بولادى»، - دەدى «نۇر وتان» پارتياسىنىڭ حاتشىسى يليا تەرەنچەنكو.
ايتۋلى شاراعا قۇزىرلى ورگان وكىلدەرىمەن قاتار، بۋكمەكەرلىك كەڭسە ماماندارى قاتىستى.
«قۇمار ويىندى ادەتكە اينالدىرىپ وعان تاۋەلدى بولۋ، الكوگول جانە ناشاقورلىققا تاۋەلدى بولۋمەن تەڭ. قۇمارلىقتىڭ وزىندىك بەلگىلەرى بار. ويىنعا قۇمارلىقتان ەمدەلۋ ءبىراز ۋاقىت پەن قارجىنى تالاپ ەتەدى. ءبىز ارنايى مونيتورينگ جۇرگىزدىك، ونىڭ ناتيجەسىندە 2015-جىلدان بەرى الماتى قالاسىندا قۇمار ويىننىڭ تۇزاعىنا تۇسكەن 266 ادام كومەك سۇرادى، قاراعاندى قالاسى بويىنشا 2018-جىلدان باستاپ 7 ادام جانە استانا بويىنشا 2017-جىلدان باستاپ 46 ادام قول ۇشىن سوزۋعا ءوتىنىش ءبىلدىردى»، - دەدى «رەنەسسانس» حالىقارالىق قاۋىمداستىعىنىڭ ديرەكتورى سەرگەي ماۆليايەۆ.
ونىڭ ايتۋىنشا، قۇمارلىقتان ارىلتۋعا ارنالعان ساۋىقتىرۋ پروتسەسى 2 ايدان 1 جىلعا دەيىنگى ۋاقىتتى تالاپ ەتەدى جانە ءبىر ايلىق ەمدەلۋ قۇنى شامامەن 300 مىڭ تەڭگەنى قۇرايدى.
مامانداردىڭ مالىمەتىنە قاراعاندا، ويىن تاۋەلدىلىگى دۇنيەجۇزىلىك دەنساۋلىق ساقتاۋ ۇيىمىنىڭ دەرت (اۋرۋ) كلاسسيفيكاتورىنا ەنگىزىلگىنىنە قاراماستان، قۇمار ويىنمەن اۋەستەنۋ مەن ونىڭ قوعام ءۇشىن قاۋىپتىلىگىن رەتتەۋدى زاڭنامالىق تۇرعىدان جەتىلدىرۋ كەرەك.
«سوڭعى 4 جىل ىشىندە ويىن كلۋبتارى مەن مەكەمەلەرىنە قاتىستى 234 قىلمىس جاسالعان، ونىڭ ىشىندە 81 ويىن مەكەمەسىنە شابۋىل جاساۋ، 53 توناۋ وقيعاسى جانە تاعى باسقا. ۇستىمىزدەگى جىلى قۇمار ويىندارىمەن بايلانىستى 6 قىلمىس جاسالدى. تاعى ءبىر ايتىپ وتەتىن پروبلەما - قۇمار ويىن مەكەمەلەرىنىڭ ەل اۋماعىندا زاڭدى تۇردە تىركەلمەۋى، وسى سەبەپتەن بىزگە ولاردى باقىلاۋ بىزگە قيىن. بىزدە قۇمار ويىننىڭ جەتەگىنە كەتكەندەرگە قاتىستى ءىس كوپتەپ قوزعالادى. مىسال كەلتىرسەك الماتى قالاسىندا كامەلەتتىك جاسقا تولماعان جاس ءوسپىرىم اتا-اناسىنىڭ رۇقساتىنسىز 2 ميلليون تەڭگەدەن استام قارجىنى بۋكمەكەرلىك كەڭسەدە ۇتىسقا سالىپ ناتيجەسىندە جەڭىلگەن. سول سەكىلدى وتكەن جىلى شىمكەنتتە قۇمار ويىندا قوماقتى ۇتىستان ايىرىلىپ، ىزاعا بولەنگەن ازامات ءوزىنىڭ اناسىن ولتىرگەن. وسى سەكىلدى دەرەكتەر جەتكىلىكتى»، - دەدى ق ر ءى ءى م اكىمشىلىك پوليتسيا كوميتەتىنىڭ باسقارما ءتوراعاسىنىڭ ورىنباسارى ماقسات بايبولوۆ.
ۇيىمداستىرۋشىلار الداعى ۋاقىتتا اتالعان ماسەلەنى تالقىلاۋ جالعاسا بەرەتىنىن ايتا كەلە، ونىڭ ناتيجەسىندە جۇمىس توبى قۇرىلىپ ناقتى شەشىمدەر قابىلداناتىنىن ءمالىم ەتتى.
