تاريحي جەڭىس: قازاقستاندىق شاڭعىشى الەمدىك بايقاۋدا جۇلدە يەلەندى

ءبىرىنشى راۋندتان سوڭ 19 جاستاعى تكاچەنكو 96,5 مەتردى باعىندىرىپ، ءبىرىنشى ورىندا تۇرعان.

ال فينالدىق كەزەڭدە ول 94,5 مەتردى باعىندىرىپ، 248,9 ۇپايمەن ۇزدىك ۇشتىكتى قورىتىندىلادى.

سايىستىڭ التىن جۇلدەسى 252,1 ۇپاي جيناعان نورۆەگيالىق توماس ماركەنگكە، كۇمىس جۇلدە گەرمانيالىق لۋكا روتقا بۇيىرعان.

قازاقستان كومانداسىنىڭ باس باپكەرى پاۆەل ۆاسيليەۆتىڭ بۇل جۇلدەنى «تاريحي جەڭىسكە» بالادى.

«تاۋەلسىز قازاقستان تاريحىندا تۇڭعىش رەت ءبىز جاس وسپىرىمدەر اراسىنداعى الەم چەمپيوناتىنان جۇلدە الىپ وتىرمىز. ارينە، بۇل ءبىز ءۇشىن ۇلكەن جەتىستىك.

جارىسقا نيكيتا ديەۆياتكين، گلەب سافونوۆ، نۇرشات تۇرسىنجانوۆتار دا قاتىستى. بيىل ءبىز العاش رەت كۆوتالار سانىن كوبەيتىپ، قاتىسۋشى سپورتشىلار سانىن تورتكە جەتكىزدىك. بۇرىن ءبىزدىڭ ەل اتىنان ەكى سپورتشىدان ارتىق قاتىسپايتىن.

سونداي-اق، ءبىز العاش رەت كوماندالىق تۋرنيردە باق سىنايمىز. الەم بويىنشا 12 كوماندا عانا قاتىساتىن ءتۋرنيردىڭ فينالىنا وتتىك. بۇل دا تاريحتا ءبىرىنشى رەت بولىپ وتىرعان جاعداي»، - دەيدى باس باپكەر.

ال سەرگەي تكاچەنكو ەل بايراعىن الەمدىك جارىستا كوتەرگەنىنە قۋانىشتى ەكەنىن ايتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى