شاش تۇسۋىنە قارسى شارالار
ادام شاشى كۇنىنە 50-100 تال ءتۇسۋى قالىپتى جاعداي سانالعانىمەن، ودان كوپ تۇسسە الدىن الۋعا تۋرا كەلەدى. شاش ءتۇسۋىن توقتاتاتىن حالىقتىق ەمىنىڭ بىرنەشە تاسىلىمەن تانىسىڭىز.
جالپى ءجيى تۇسەتىن شاشتى ەمدەمەس بۇرىن الدىمەن ءتۇبىن قاتايتاتىن شارالار جۇرگىزۋ كەرەك. ول ءۇشىن 1-2-اي بويى اپتاسىنا ءبىر رەت شاش ءتۇبىن سپيرتپەن نەمەسە مايسانا مايىمەن (كاستوروۆوە ماسلو) ءسۇرتىپ وتىرادى. 1-2-اي وتكەن سوڭ شاش ءتۇبى قاتايا باستايدى. ال وتە جاقسى ناتيجەگە جەتۋ ءۇشىن مىناداي ءتۇرلى ەمدەردى جاساۋعا بولادى.
ءبىر پيازدىڭ سولىنە سول مولشەردە مايسانا مايىن (كاستوروۆوە ماسلو) ، 1 جۇمىرتقانىڭ سارىسىن قوسىپ شاشتىڭ تۇبىنە جاعادى. 45 مينۋتتان سوڭ شاشتى جۋىپ، تاراقپەن تارايدى.
پيازدى مايدالاپ تۋراپ، ۇستىنە 100 م ل. سپيرت قۇيادى دا ءبىر تاۋلىككە قويادى. دايىن تۇنبامەن شاشتىڭ ءتۇبىن ءسۇرتىپ، پوليەتيلەن پاكەتتىڭ سىرتىنان سۇلگىمەن باستى ورايدى. 20-30 مينۋتتان سوڭ شاشتى سالقىنداۋ سۋمەن جۋادى.
جىلى نە قايناعان سۋعا بال سالادى (1 ليتر سۋعا 2 اس قاسىق بال) . باستىسى بال ەرىسە بولعانى. وسى سۋمەن شاشتىڭ تۇبىنە ماسساج جاساپ جۋادى. مۇنى اپتاسىنا 2 رەت قايتالايدى. بۇل شاشتىڭ ءتۇبىن قاتايتادى جانە تەز وسۋىنە كومەكتەسەدى.
سارىمساق، قايىڭ، الوە شىرىندارى، جۇمىرتقانىڭ سارىسى جانە بال - وسىلاردىڭ ءارقايسىسىنان 1 شاي قاسىقتان الىپ جاقسىلاپ ارالاستىرادى. قوسپانى باس تەرىسىنە جاعىپ، 1-2 ساعاتتان سوڭ جۋىپ تاستايدى. سونىمەن قاتار، قايىڭ جاپىراعىنىڭ تۇنباسىمەن شايسا تىپتەن جاقسى.
جارتى ستاقان ايران، 1 جۇمىرتقا، شاي قاسىق كاكاونى ارالاستىرىپ، باس تەرىسىنە جاعادى. قوسپا ازداپ كەپكەن سوڭ قايتا جاعادى. دايىنداعان قوسپا تاۋسىلعانشا وسىلاي جالعاستىرادى. 20-25 مينۋتتان سوڭ بالالارعا ارنالعان سۋسابىنمەن شاشتى جۋىپ تاستايدى.
1 اس قاسىق قالاقاي (كراپيۆا) جاپىراعىنا 200 م ل. قايناعان سۋ قۇيىپ، ءبىر- ءبىر جارىم ساعات تۇندىرادى دا ءسۇزىپ الادى. شاشتى جۋعان سوڭ، ازداپ كەپتىرىپ، وسى تۇنبامەن باس تەرىسىن سۇرتەدى. ەمدى اپتاسىنا 1-2 رەت جاسايدى.
قۇرعاق وگەيشوپتىڭ جاپىراعى نەمەسە گۇلىنەن 1 اس قاسىعىن الىپ، 1 ستاقان قايناعان سۋ قۇيادى. 30 مينۋتتان سوڭ تۇنبامەن شاش ءتۇبىن سۇرتەدى. الايدا مۇنى شاشتى جۋاردان 40-60 مينۋت بۇرىن جاساعان دۇرىس.
https://massaget.kz
