اۋقىمدى تاريحي كينوجوبا «قاسىم حان» فيلمىنە كاستينگ جاريالاندى
اتالعان كينوتۋىندىنى ق ر مادەنيەت جانە سپورت مينيسترلىگى تاپسىرىسى بويىنشا ش. ايمانوۆ اتىنداعى «قازاقفيلم» اق تۇسىرەدى.
كينوجوبا قازاقتىڭ ۇلى حاندارىنىڭ ءبىرى - قاسىم حاننىڭ ءومىرى تۋرالى باياندايدى.
«فيلمنىڭ كوركەمدىك جەتەكشىسى - «ەرتۇعىرىل» سەريالىن ءتۇسىرىپ جاتقان تۇرىك رەجيسسەرى مەتين گيۋناي. باستى رولدەرگە، قوسالقى جانە ەپيزودتىق رولدەرگە 3 جانە 80 جاس ارالىعىنداعى بارلىق قازاقستاندىقتار (بالالار، ەر ادامدار مەن ايەلدەر) قاتىسا الادى (ەر ازاماتتاردىڭ بويى 180 س م. كەم بولماۋى ءتيىس) . باستى تالاپ - قازاق تىلىندە ەركىن سويلەۋى كەرەك. كاستينگ قازاقستان بويىنشا وتەدى» ، - دەلىنگەن حابارلامادا.
الماتى قالاسىندا كاستينگ جۇمىستارى 25 - قاڭتاردان باستالادى.
كاستينگكە قاتىسۋ ءۇشىن kazakhfilmcast@gmail.com ەلەكتروندى پوشتاسىنا كەلەسى اقپاراتتاردى: جاقىننان بەت بوياۋسىز، كوزىلدىرىكسىز جانە لينزاسىز، باس كيىمسىز، وڭدەلمەگەن فوتوسۋرەتتەردى (سەلفي ەمەس) ، سونداي- اق تۇلا بويى كورىنەتىن ءبىر سۋرەت، جانە ءوزى تۋرالى قىسقاشا اقپاراتتى (اتى- ءجونى، جاسى، بويى مەن سالماعى، ءبىلىمى جانە كينوداعى تاجىريبيە تۋرالى) جولداۋ كەرەك.
«قۇرمەتتى ايەلدەر قاۋىمى! كاستينگكە بەت بوياۋسىز جانە جاساندى كىرپىكسىز كەلۋلەرىڭىزدى سۇرايمىز. تاتۋاجى بار قىز- كەلىنشەكتەردى قابىلدامايمىز» ، - دەپ ەسكەرتەدى كينوستۋديادان.
ەسكە سالا كەتسەك، ق ر مادەنيەت جانە سپورت ءمينيسترى ارىستانبەك مۇحامەدي ۇلى قاسىم حان تۋرالى فيلمنىڭ سەناريى جازىلىپ جاتقانىن بىلتىر حابارلاعان بولاتىن.
«قاسىم حان تۋرالى فيلمنىڭ جوباسى بويىنشا ءبىز كارتينانىڭ سەناريىنە تاپسىرىس بەردىك. البەتتە، ول سەناريدىڭ قالاي جازىلعانىنا دەن قويارىمىز انىق. ەگەر وندا قاسىم حاننىڭ بارلىق ەرلىگى مەن ءومىرى قامتىلماسا، ارى قاراي جۇمىستى جالعاستىراتىن بولامىز. رەجيسسەر - «ەرتۇعىرىل» سەريالىن تۇسىرگەن تۇرىك رەجيسسەرى بولادى. ول قازاقستاندىق ماماندارمەن بىرگە سەناريدى جازىپ شىقتى. قازىرگى تاڭدا قازاقستاندىق رەجيسسەرلەر ءىرى جوبالارمەن ءجۇر. اقان ساتايەۆ «تۇمار پاتشايىمدى» ءتۇسىرىپ جاتسا، رۇستەم ءابدىراش «الماس قىلىشتى» جالعاسىنا كىرىسىپ كەتتى. الەمدىك دەڭگەيگە جەتۋ ءۇشىن ءبىز مويىندالعان رەجيسسەرلەر مەن اۆتورلاردى شاقىرۋىمىز كەرەك» ، - دەگەن ەدى ارىستانبەك مۇحامەدي ۇلى.
