ادەبيەت اكادەمياسى اشىلسا، اۋىلداعى تالانتتار دا ۇمىت قالماسا ەكەن - جاس اقىن
ونىڭ ايتۋىنشا، بويىندا جالىنى، قارىمى، دارىنى بار، ءسوزىنىڭ ءسانى جانە ايبىنى، ارىنى بار جاستار قاي زاماندا بولماسىن قوعامنىڭ قوزعاۋشى كۇشى سانالادى.
قازاق ادەبيەتىنىڭ تاريحىندا قالعان كىل جاقسىلار مەن جايساڭدار جاستارعا ءۇمىت ارتىپ، ۇيقىدا جاتىرعان حالىقتى وياتۋدى سەنىپ تاپسىرعان. تۇسىنگەنگە، بۇل - جاۋاپكەرشىلىك.
ەلباسى نۇرسۇلتان نازاربايەۆ وسى ءۇردىستى جالعاستىرىپ، جولداۋلارىندا جاستار تاراپىنا باسىمدىق تانىتىپ، ءتۇبى باقانداي ءبىر جىلدى جاستارعا ارنادى. بۇل - مارتەبە. بۇل - سىلكىنەتىن، جەلپىنەتىن، وزىق ويعا كەزەك بەرەتىن، جارقىن ىستەرگە ۇمتىلاتىن جىل. ۇرانداتىپ، مىنبەلەردەن وتتى سوزدەر ايتىپ، قالا بەردى ءتۇرلى اكسيالاردىڭ باسىن قايىرۋدى دوعارىپ، ەلدىڭ، جەردىڭ پايداسىنا اساتىن ءىرى جۇمىستاردى قولعا الۋىمىز قاجەت.
- جاستار يدەيا ايتسا، لەزدە ورىندالاتىن شاقتا بەرىلگەن مۇمكىندىكتى قالت جىبەرمەگەنىمىز ابزال. ۇشقان قۇستىڭ قاناتى تالاتىن سايىن دالا، بىرلىگى جاراسقان، اتاعى مەن ايبارى عاسىرلاردان ءارى اسقان ءدۇيىم قازاقستاندىقتار، حالىقتى جەل مەن داۋىلدان قالقالاعان، ەل ءۇمىتىن ارقالاعان ەلباسى مەملەكەتىمىزدىڭ بولاشاعىن بىزدەرمەن، ياعني جاستارمەن بايلانىستىرىپ وتىر. ەندەشە، قوس جەڭدى ءتۇرىپ، الەمنىڭ جاڭالىقتارىن ءبىلىپ، قۇزار شىڭداعى جەتىستىكتەردى «ءىلىپ» ، العا قاراي قارىشتاپ ءجۇرىپ سەنىم ۇدەسىنەن شىعامىز دەپ ۇمىتتەنەمىن. جاستار جەلپىنىپ باستادى، سەنىم مەن ءۇمىت بار، راس ءبارى. اشىق بوپ ەلىمنىڭ اسپانى، العا باس، قازاقستان جاستارى! - دەيدى جاس اقىن.
«قالام مەن پاراقتى سەرىك ەتكەن مەن ءۇشىن كەشەگى جيىندا جاس اقىن مەرەي قارتتىڭ ەلباسىعا ايتقان ءوتىنىشى ايرىقشا ۇنادى. ياعني ادەبيەت اكادەمياسىن اشىپ، جاستاردىڭ جىرلارىن جاھانعا ايگىلى ەتۋ سەكىلدى ۇسىنىستىڭ ومىرشەڭ بولۋىن تىلەدىم ىشتەن. اكادەميا اشىلار بولسا، اۋىلداردا جۇرگەن، تاسادا قالعان تالانتتاردىڭ ەسىمدەرى ەلەنىپ، ادەبيەتتە، بالكىم، جاڭا باعىتتار دۇنيەگە كەلەر مە ەدى؟ ! سول سەبەپتى ادەبيەت اكادەمياسىنىڭ اشىلۋى جاستار جىلىنداعى ەڭ عالامات ءىستىڭ ءبىرى بولىپ تاريحتا قالادى دەپ ويلايمىن» ، - دەدى قازاقپارات تىلشىسىنە ادىلەت ورىنباساروۆ.
