قازاقتىڭ بەلگىلى اقىنى ورازاقىن اسقار دۇنيەدەن وزدى

بۇل حاباردى ق ر مادەنيەت جانە سپورت مينيسترلىگى راستادى.

«ورازاقىن اسقار ءبىر ساعات بۇرىن الماتىدا اۋىر ناۋقاستان قايتىس بولدى. اقىننىڭ جاقىندارى مەن تۋىستارىنا كوڭىل ايتامىز. مارقۇمدى شىعارىپ سالۋ مەن جەرلەۋ بويىنشا كەيىنىرەك اقپارات بەرەمىز»، - دەپ جاۋاپ بەردى ق ر مادەنيەت جانە سپورت مينيسترلىگىنىڭ باسپا ءسوز حاتشىسى ايدار قىرىقباي.

ورازاقىن اسقار 1935 -جىلى قىتاي حالىق رەسپۋبليكاسىنىڭ ىلە ايماعىندا دۇنيەگە كەلگەن. قۇلجا قالاسىندا گيمنازيانى ءبىتىرىپ، ءۇرىمجى قالاسىنداعى ۇلتتار ينستيتۋتىنىڭ ءتىل جانە ادەبيەت فاكۋلتەتىنە تۇسكەن. قوسىمشا «شىنجاڭ گازەتى» رەداكسياسىنا قىزمەتكە تۇرعان. 1955 -جىلى اتا- مەكەنى قازاقستانعا كوشىپ كەلىپ، 1961 -جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن ءبىتىرىپ شىعادى.

ءبىراز جىل قازاق ك س ر عىلىم اكادەمياسىنىڭ ش. ءۋاليحانوۆ اتىنداعى تاريح، ەتنوگرافيا جانە ارحەولوگيا ينستيتۋتىندا كىشى عىلىمي قىزمەتكەر، ودان كەيىن قازاقستان جازۋشىلار وداعىنىڭ كوركەم ادەبيەتتى ناسيحاتتاۋ بيۋروسىندا نۇسقاۋشى، رەسپۋبليكالىق كىتاپ پالاتاسىندا ءبولىم مەڭگەرۋشىسى، «جالىن» باسپاسىندا اعا رەداكتور بولعان. جىلدار بويى قازاقتىڭ قارا ولەڭىن ەل ىشىنەن جيناپ، ەكى تومىن باستىردى. «ادەبي مۇرا» باعدارلاماسىنا وراي، «الەم بالالار ادەبيەتىنىڭ» قازاق تىلىندەگى ەلۋ تومدىعىن شىعارۋ جۇمىسىنا اتسالىستى.

 قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلى اقىن، قوعام قايراتكەرى، ورازاقىن اسقاردىڭ دۇنيە سالۋىنا وراي كوڭىل ايتتى.

 «قازاقتىڭ ماڭدايىنا بىتكەن دارا تۇلعا، كورنەكتى قالامگەر، ۇلت جاناشىرى ورازاقىن اسقار اعامىز دۇنيەدەن وزدى. ۇلتتىق ادەبيەتىمىزدە ءوزىنىڭ قايتالانباس قولتاڭباسىن قالدىرعان تالانتتى سۋرەتكەر، قازاقتىڭ ءبىرتۋار ازاماتى كەلمەس ساپارعا اتتاندى. قازاق ادەبيەتىنىڭ قارالى كۇنى بارشاڭىزعا قايعىرىپ كوڭىل ايتامىن. اللا الدىڭىزدان جارىلقاسىن، اعا! جانىڭىز ءجاناتتا بولسىن»، - دەپ جازدى مينيستر كوڭىل ايتۋ حاتىندا.

فوتو: almaty-akshamy.kz

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى