زاعيپ جاندار فۋتبول كومانداسى حالىقارالىق ارەناعا شىقپاق
«ءبىزدىڭ فۋتبول كوماندامىز وتكەن جىلدىڭ قىركۇيەك ايىندا الماتىداعى «قايرات» فۋتبول كلۋبىنىڭ بازاسىندا قۇرىلدى. بۇل فۋتبول ءتۇرىنىڭ ەرەجەسى بويىنشا كوماندا ەكى قۇرامدا 5\5 ويىنشىدان تۇرادى. قازىرگى كۇنى 12 ويىنشى بار ولاردىڭ %80 كوزى تولىعىمەن كورمەيدى»، - دەيدى قازاقستانداعى «Blind football» جوباسىنىڭ ۇيلەستىرۋشىسى شىڭعىس تەمىرحانوۆ.
ونىڭ ايتۋىنشا، «Blind football Team» ازىرگە جالعىز كوماندا بولعاندىقتان ول كلۋبتىق جانە ۇلتتىق قۇراما دەڭگەيىندە تەڭدەي وينايدى.
«كوماندا قۇرامىنا كىرۋ ءۇشىن فۋتبول ويىنىنا دەگەن ەرەكشە ىنتادان بولەك، سپورتشىنىڭ جاقسى فيزيكالىق دايىندىعى بولۋى ءتيىس. وتكەن جىلدىڭ قاراشا ايىندا ۋ ە ف ا جانە IBSA ۇيىمدارىنىڭ قولداۋىمەن جاتتىقتىرۋشى، گيد، پسيحولوگ جانە قىزمەت كورسەتۋشى ماماندارعا ارنالعان وقىتۋ كۋرسى ۇيىمداستىرىلدى. بۇگىنگى تاڭدا فۋتبول كومانداسىن جەتىلدىرۋ جانە ناسيحاتتاۋ جۇمىستارىن بەلسەندى جۇرگىزۋدەمىز»، - دەدى ول.
قازىرگى ۋاقىتتا فۋتبولشىلار ۇستىمىزدەگى جىلدىڭ مامىر ايىندا وتەتىن رەسەي كۋبوگى مەن ازيا چەمپيوناتىنا قىزۋ دايىندىق ۇستىندە. ودان بولەك، 2020-جىلى توكيودا وتەتىن پاراليمپيادالىق ويىنعا جولداما الۋعا قاتىسۋ دا جوسپاردا بار.
«Blind football» - دىڭ ەرەجەسى بويىنشا كوماندا قۇرامىندا 5 ادام وينايدى، ونىڭ تورتەۋى زاعيپ جاندار، بەسىنشىسى قورعاۋشى، ول كوزى كورەتىن ويىنشى بولۋى شارت. سونىمەن قاتار، قاجەت جاعدايدا ويىنشىلار اۋىسا الادى جانە ءبىر ويىن 20-25 مينۋتقا سوزىلادى. تاعى ءبىر ايتا كەتەرلىگى، فۋتبول وينايتىن 4 ويىنشىعا ارنايى كوزىلدىرىك بەرىلەدى. ونىڭ ەكى ماقساتى بار، ءبىرىنشى قورعاۋ قۇرالى رەتىندە، ەكىنشىدەن ادىلدىك ءۇشىن. ويتكەنى، ءار ويىنشىنىڭ كورۋ دەڭگەيى ءارتۇرلى، ياعني بىرەۋلەر ورتاشا، ال بىرەۋلەر تومەن دەڭگەيدە كورەدى، ال كوزىلدىرىكتەن ەشتەڭە كورىنبەيدى. ودان بولەك، ويىنشىلارعا ءجون سىلتەپ تۇراتىن ارنايى گيد ماماندارى بار، ولار قاقپانىڭ قاسىندا تۇرادى جانە ويىن الاڭىنىڭ ەكى جاق شەتىندە جاتتىقتىرۋشىلارى تۇرادى، ولاردىڭ ءوز ويىنشىلارىنا ءجون سىلتەۋگە قۇقىقتارى بار»، - دەيدى ش. تەمىرحانوۆ.
ايتا كەتسەك، زاعيپ جاندارعا ارنالعان «Blind football» سپورت تۇرىنەن العاش رەت الەم چەمپيوناتى 1986-جىلى يسپانيادا ءوتتى، ال 2004-جىلدان باستاپ اتالعان فۋتبول ءتۇرى پاراليمپيادا ويىندارىنىڭ تىزىمىنە ەنگىزىلدى.
