ۇيعىر ءتىلىن لاتىن گرافيكاسىنا كوشىرۋ ماسەلەسى قارالۋدا- ۇكىمەت باسشىسى
«مەملەكەت باسشىسى ن. ءا. نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسىندا قازاق ءتىلى ءالىپبيىن لاتىن گرافيكاسىنا كوشىرۋ جۇمىستارى بويىنشا مىندەت كوزدەلگەن. وسى تاپسىرمانى ىسكە اسىرۋ اياسىندا قازاق ءتىلى ءالىپبيىن لاتىن گرافيكاسىنا 2025 -جىلعا دەيىن كەزەڭ- كەزەڭىمەن كوشىرۋ جونىندەگى ءۇش كەزەڭدى قامتيتىن ءىس- شارالار جوسپارى بەكىتىلدى. قازىرگى ۋاقىتتا باستاپقى ساتىداعى جۇمىستار ىسكە اسىرىلۋدا»، - دەدى باقىتجان ساعىنتايەۆ.
اتاپ ايتقاندا پرەمەر- مينيستر دەرەگىنشە، جاڭا قازاق الىپبيىنە كوشۋ تۋرالى قوعامدى تولىق اقپاراتتاندىرۋ ءۇشىن اۋقىمدى اقپاراتتىق- ءتۇسىندىرۋ، سونىمەن قاتار رەسپۋبليكا بويىنشا قازاق ءالىپبيىن لاتىن نەگىزىندە اپروباتسيادان وتكىزۋ جۇمىستارى جۇرگىزىلدى. جاڭا الىپبيگە نەگىزدەلگەن قازاق ءتىلى ەملەسىنىڭ نەگىزگى ەرەجەلەرى بەلگىلى لينگۆيست عالىمدارىمىزدىڭ اراسىندا جان- جاقتى زەردەلەنىپ، قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا جالپى ماقۇلدادى. جاڭا ءالىپبيدى IT تەحنولوگيا جانە اقپاراتتىق كەڭىستىككە بەيىمدەۋ جۇمىستارى جۇرگىزىلۋدە.
«ق ر كونستيتۋتسياسىنىڭ 7-بابىنا سايكەس، قازاقستان رەسپۋبليكاسىندا مەملەكەتتىك ءتىل - قازاق ءتىلى. مەملەكەتتىك ۇيىمداردا جانە جەرگىلىكتى باسقارۋ ورگاندارىندا ورىس ءتىلى رەسمي تۇردە قازاق تىلىمەن تەڭ قولدانىلادى. مەملەكەت قازاقستان حالقىنىڭ تىلدەرىن ۇيرەنۋ مەن دامىتۋ ءۇشىن جاعداي تۋعىزۋعا قامقورلىق جاسايدى. سونىمەن قاتار، «قازاقستان رەسپۋبليكاسىنىڭ ءتىل تۋرالى» زاڭىنىڭ 23 - بابىنا سايكەس ءتىلدىڭ دامۋى مەملەكەتتىك تىلدىڭ باسىمدىعىن جانە ءىس قاعازدارىن جۇرگىزۋدى قازاق تىلىنە كەزەڭ- كەزەڭمەن كوشىرۋدى كوزدەيتىن قازاقستان رەسپۋبليكاسى مەملەكەتتىك جوسپارلاۋ جۇيەسىنىڭ قۇجاتتارىمەن قامتاماسىز ەتىلەدى. قازاقستان رەسپۋبليكاسى ۇكىمەتىنىڭ 2018 -جىلعى 2 - شىلدەدەگى № 401 قاۋلىسىمەن بەكىتىلگەن قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011 - 2019 -جىلدارعا ارنالعان مەملەكەتتىك باعدارلاماسىندا لاتىن گرافيكاسىنا قازاق ءالىپبيىن عانا كوشىرۋ قاراستىرىلعاندىعىن اتاپ وتكەن ءجون»، - دەدى ول.
وسى رەتتە باقىتجان ساعىنتايەۆ ۇيعىر ءتىلىن لاتىن گرافيكاسىنا كوشىرۋ ماسەلەسىن پىسىقتاۋدا جوعارىدا اتالعان نورمالاردى باسشىلىققا الۋ قاجەتتىگىنە نازار اۋدارتادى. سونداي- اق، مەملەكەتتىك ءتىلدى جاڭعىرتۋدىڭ ماڭىزدى كەزەڭىندە قازاقستانداعى تۇركى تىلدەس ەتنوستاردىڭ ءالىپبيىن لاتىن نەگىزدى الىپبيگە كوشىرۋ ماسەلەسىن قاراۋ تەرەڭ جانە جان- جاقتى زەردەلەۋدى، سونىڭ ىشىندە ۇيعىر جازۋىن لاتىن گرافيكاسىنا كوشىرۋ بويىنشا ۇسىنىس تىڭعىلىقتى زەردەلەۋدى جانە ەگجەي- تەگجەيلى پىسىقتاۋدى تالاپ ەتەتىندىگىن اتاپ وتەدى.
«وسى رەتتە مادەنيەت جانە سپورت مينيسترلىگىنە مۇددەلى مەملەكەتتىك ورگاندارمەن بىرلەسە وتىرىپ، عالىمدار، دەپۋتاتتار كورپۋسى، قازاقستان ۇيعىرلارىنىڭ ەتنومادەني ورتالىعىن تارتا وتىرىپ، اتالعان ماسەلەنى تالقىلاپ، جان- جاقتى تولىق تالداۋ جۇرگىزۋ تاپسىرىلدى. وسى ماسەلەلەردى تولىق پىسىقتاعاننان كەيىن مادەنيەت جانە سپورت مينيسترلىگى اتقارىلعان جۇمىستار تۋرالى دەپۋتاتتار كورپۋسىنا قوسىمشا اقپارات بەرەتىن بولادى»، - دەدى ۇكىمەت باسشىسى.
ايتا كەتەيىك، قازاقستان حالقى اسسامبلەياسىنان سايلانعان ءماجىلىس دەپۋتاتى شايماردان نۇرىموۆ ق ر پرەمەر- ءمينيسترى باقىتجان ساعىنتايەۆتىڭ اتىنا ساۋال جولداپ، قولدانىستاعى ۇيعىر جازۋىن لاتىن گرافيكاسىنا كوشىرۋ قاجەتتىگىن ايتقان بولاتىن.
