مىنا جەرگە بومبا تۇسپەي مە؟ - پرەزيدەنت جۋسان وپەراتسياسىندا قۇتقارىلعان بالالار تۋرالى ايتىپ بەردى
بۇل تۋرالى مەملەكەت باسشىسى نۇرسۇلتان نازاربايەۆ استانادا جاستار جىلىنىڭ رەسمي اشىلۋىندا ايتىپ بەردى.
«ءار ادام ءوز تاعدىرىن ءوزى جاسايدى. جاقىندا سيرياداعى شيەلەنىس ايماعىنان 47 قازاقستاندىقتى الىپ شىققانىمىزدى بىلەسىزدەر. ولاردىڭ اراسىندا 30 بالا بار، اكەلەرى سوعىستا مەرت بولعان، انالارى قورعاۋسىز قالعان. مۇنداي قاۋىپتى ءارى ماڭىزدى وپەراتسيانى ءبىزدىڭ ارنايى قىزمەت وزگە مەملەكەتتەرمەن بىرلەسىپ جۇرگىزدى. ءبىزدىڭ ازاماتتاردى الدادى، جۇماققا سەندىردى، الىپ كەتتى. بارلىق ەلدەر بۇل لاڭكەستەردىڭ كوزىن جويۋعا تىرىسىپ جاتىر. لاڭكەستەردىڭ اراسىندا ءبىزدىڭ قازاقستاندىقتار دا بار. جۇزدەگەن وتانداسىمىز وققا ۇشتى. امان قالعاندارىن ەلگە قايتارۋدى جالعاستىرامىز» ، - دەدى پرەزيدەنت.
سونىمەن بىرگە، پرەزيدەنت شيەلەنىس ايماعىنان ورالعانداردى بەيىمدەۋ قاجەتتىگىن ەسكە سالدى.
«كىشكەنتاي بالالار ۇشاقتان تۇسكەندە «مىنا جەرگە بومبا تۇسپەي مە؟ » دەپ شەشەسىنەن سۇرايدى ەكەن. تۋعاننان بومباعا ۇيرەنگەن.. . ەشقانداي بومبا تۇسپەيدى» ، - دەدى ن. نازاربايەۆ.
ەسكە سالا كەتسەك، قازاقستان پرەزيدەنتى نۇرسۇلتان نازاربايەۆ قازاقستان ازاماتتارىن سيريادان ەۆاكۋاتسيالاۋعا بايلانىستى مالىمدەمە جاساعان بولاتىن. مەملەكەت باسشىسى اتاپ وتكەندەي، 6 - قاڭتاردا قۇقىق قورعاۋ ورگاندارى مەن سىرتقى ىستەر مينيسترلىگى جۇرگىزگەن گۋمانيتارلىق شارا ناتيجەسىندە سيريادان 47 ازاماتىمىز، سونىڭ ىشىندە 30 بالا ەلىمىزگە قايتارىلدى.
ولارمەن پسيحولوگتار، ءدىنتانۋشىلار مەن پەداگوگتار قوسىمشا جۇمىس ىستەيدى جانە جوعالعان قۇجاتتاردى قالپىنا كەلتىرۋ بويىنشا كومەك كورسەتىلەدى. كارانتين مەرزىمى اياقتالعان سوڭ، بالالار مەن ايەلدەر وزدەرىنىڭ بۇرىنعى مەكەنجايىنا جىبەرىلەدى.
ايتا كەتەيىك، ق ر پرەزيدەنتى نۇرسۇلتان نازاربايەۆ قازاقستان حالقىنا بيىلعى جولداۋىندا 2019 -جىلدى جاستار جىلى دەپ جاريالاۋدى ۇسىنعان بولاتىن.
