پرەزيدەنت اۋىلعا بارعان جاستاردىڭ جاردەماقىسىن كوبەيتۋدى تاپسىردى
پرەزيدەنتتىڭ ايتۋىنشا، بۇگىندە حالىقتىڭ اۋىلدان قالاعا كوشۋ قارقىنى قاتتى بولسا دا، اۋىل جاستارىنىڭ ۇلەسى ءالى دە جوعارى - 43 پروتسەنت. وتكەن جىلى ون ءبىر ايدىڭ ىشىندە ەلىمىزدە اۋىلدان قالاعا كوشكەن جاستاردىڭ سانى 220 مىڭنان استى.
«سوندىقتان ۇكىمەت پەن اكىمدىكتەر جاستاردىڭ ءبىلىم الۋىنا، جۇمىسقا ورنالاسۋىنا، دەمالىس جانە باسقا دا ماسەلەلەرىن جۇيەلى شەشۋگە كۇش سالۋى قاجەت. «اۋىل - ەل بەسىگى» جوباسى اياسىندا ينفراقۇرىلىمدى دامىتىپ، جەرگىلىكتى جەرلەردىڭ كادرلىق الەۋەتىن كۇشەيتە ءتۇسۋىمىز كەرەك. بىزدە «ديپلوممەن اۋىلعا» دەگەن باعدارلاما بار. وسىنىڭ ءتىزىمىن كەڭەيتۋدى ۇسىنامىن. اۋىلعا كوشىپ بارعانى ءۇشىن جاستاردىڭ جاردەماقىسى بۇرىن 70 ايلىق ەسەپتىك كورسەتكىش بولسا، سونى 100 ايلىق ەسەپتىك كورسەتكىشكە دەيىن كوتەرۋ كەرەك»، - دەدى ن. نازاربايەۆ جاستار جىلىنىڭ سالتاناتتى اشىلۋ راسىمىندە.
وسى ورايدا مەملەكەت باسشىسى اۋىل شارۋاشىلىعىمەن كەڭىنەن اينالىسۋعا ۇندەدى. سەبەبى قازىرگى ۋربانيزاتسياعا قاراماستان، ازىق-تۇلىك ونىمدەرىنە دەگەن سۇرانىس ەشقاشان تومەندەمەيدى. ال ونداي ونىمدەردىڭ باسىم بولىگى اۋىلدى جەرلەردە وندىرىلەدى.
ايتا كەتەيىك، ەلورداداعى «نۇر الەم» پاۆيلونىندا ەلباسى نۇرسۇلتان نازاربايەۆتىڭ قاتىسۋىمەن «تاۋەلسىزدىك ۇرپاقتارى» اتتى جاستار جىلىنىڭ سالتاناتتى اشىلۋ ءراسىمى ءوتىپ جاتىر.
ق ر پرەزيدەنتى نۇرسۇلتان نازاربايەۆ قازاقستان حالقىنا وتكەن جىلعى جولداۋىندا 2019-جىلدى جاستار جىلى دەپ جاريالاۋدى ۇسىنعان بولاتىن. پرەزيدەنت ءوز سوزىندە جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەكتىگىن ايتقان ەدى. ال، ارادا ءبىر ايدان استام ۋاقىت وتكەندە ەلباسى جارلىعىمەن 2019-جىل جاستار جىلى دەپ جاريالاندى.
