وسكەمەننىڭ تيتانى جاپونياعا دايىن ءونىم رەتىندە ساتىلۋى مۇمكىن
شىعىس قازاقستان مەملەكەتتىك تەحنيكالىق ۋنيۆەرسيتەتىنىڭ عالىمدارى ءۇ م ز ماماندارىمەن بىرگە تيتان جانە نيوبيدەن كومپيۋتەرلىك توموگرافياعا قاجەت جوعارى وتكىزگىش سىمدار جاساۋدى قولعا العان بولاتىن. ەكى جىل بويى جوبا تەوريالىق تۇرعىدان پىسىقتالىپ، وتكەن جىلدىڭ ورتاسىندا العاشقى ۇلگىسى الىنعان. ونىڭ ساپاسىن تەكسەرۋ ءۇشىن جاپونياعا جىبەرىپتى. Furukawa Electric Co.، Ltd كومپانياسىنىڭ ماماندارى العاشقى ۇلگىنىڭ ءساتتى شىققانىن كورىپ، جوبامەن جان- جاقتى تانىسۋ ءۇشىن وسكەمەنگە كەلدى. جاپونيالىق دەلەگاتسيانى وبلىس اكىمى دانيال احمەتوۆ ءوزى قابىلداپ، مەيماندارمەن جوبانىڭ بولاشاعى تۋرالى پىكىر الماستى. جاپونيالىق كومپانيانىڭ ساۋدا جونىندەگى باس ديرەكتورى حيروكازۋ سۋبوۋچي وسكەمەندىك جوبانىڭ العاشقى ءونىمى ساپالى بولىپ شىققانىن اتاپ ءوتتى.
«جالپى، ءونىمنىڭ ساپاسى ويداعىداي. ءبىز جاساعان سىناقتاردىڭ بارىنەن ءساتتى ءوتتى. ءوز تاراپىمىزدان ءوندىرىس پروتسەسىن وڭتايلاندىرۋ بويىنشا ناقتى ۇسىنىسىمىز بار. بۇل تۇرعىدا سىزدەرگە تەحنولوگيالىق قولداۋ كورسەتۋگە دايىنبىز» - دەدى جاپونيا وكىلى.
ال دانيال احمەتوۆ جىلدىڭ ەكىنشى جارتىسىندا وسكەمەننىڭ تيتانى مەن ءنيوبيى دايىن ءونىم رەتىندە ساۋداعا شىعۋى مۇمكىن ەكەنىن ايتتى.
«بەس ميلليارد تەڭگەدەن استام قارجىعا بىرنەشە تەحنولوگيالىق جوبا باستاعان بولاتىنبىز. سونىڭ ءبىرى - ءۇ م ز مەن ش ق م ت ۋ بىرلەسىپ ىسكە اسىرىپ جاتقان جوعارى وتكىزگىش سىم ءوندىرىسى. العاشقى ۇلگىنى جاپونيالىق ماماندار جوعارى باعالاپ وتىر. ولار ايتقان كىشىگىرىم ەسكەرتپەلەردى ەنگىزىپ، ءونىمدى بارلىق تالاپقا ساي ەتەتىن بولامىز. جىلدىڭ ەكىنشى جارتىسىندا جوبانىڭ كوممەرتسيالىق كەزەڭىنە كوشۋىمىز مۇمكىن. بۇل ءونىمنىڭ قانداي تەحنيكالىق بازادا ءوندىرىلىپ جاتقانىن جاپونيالىق ارىپتەستەرىمىز وسى ءىس ساپار بارىسىندا كورەتىن بولادى» - دەدى دانيال احمەتوۆ.
كەزدەسۋدەن كەيىن جۋرناليستەردىڭ سۇراعىنا جاۋاپ بەرگەن حيروكازۋ سۋبوۋچي جوبانىڭ بولاشاعى زور ەكەنىن اتادى. الايدا، كومپيۋتەرلىك توموگرافياعا اۋاداي قاجەت دەپ سانالاتىن اتالمىش سىمداردى قانشا كولەمدە ساتىپ الۋعا نيەتتى ەكەندەرىن اشىپ ايتپادى.
«ازىرگە ارىپتەستىك قاتىناس كەڭەس بەرۋ دەڭگەيىندە عانا تۇر. سوندىقتان قانداي دا ءبىر ساندى ايتۋ قيىن. ءبارىن ۋاقىت كورسەتەدى» - دەدى ول.
ۇسىنىلىپ وتىرعان سىمدار «ن ت-47» ماركالى بالقىمادان جاسالادى. الداعى ەكى كۇن بويى جاپونيالىق دەلەگاتسيا اتالمىش بالقىمانى الۋ جولدارىمەن تانىسادى دەپ كۇتىلۋدە.
