قازاقستان ازاماتتارى ساۋساق ىزىمەن مەملەكەتتىك قىزمەتتەردى الا الادى
بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا «ازاماتتارعا ارنالعان ۇكىمەت» مەملەكەتتىك كورپوراتسياسى باسقارما ءتوراعاسى ابىلايحان وسپانوۆ ايتتى، دەپ حابارلايدى قازاقپارات ءتىلشىسى.
«مەملەكەتتىك قىزمەتتەردى الۋ پروتسەسىن جەڭىلدەتۋ ءۇشىن ءبىز قىزمەت الۋشىلاردىڭ جەكە باسىن راستاۋدىڭ جاڭا مەحانيزمىن ىسكە قوستىق. ەندى ازاماتتار قىزمەتتى بەت-بەينەسى نەمەسە ساۋساق ىزدەرىنىڭ كومەگىمەن الا الادى، سونىڭ ارقاسىندا ەلەكتروندى سيفرلىق قولتاڭبا قولدانۋ نەمەسە جەكە كۋالىكتى ۇسىنۋ قاجەتتىلىگى جوعالادى»، - دەدى ول.
ونىڭ ايتۋىنشا، بۇل بازانى قارجى، كوممەرتسيالىق قىزمەت كورسەتۋ جانە قاۋىپسىزدىك سالالارىندا، سونداي-اق عيماراتقا كىرۋ جۇيەسىندە پايدالانۋعا بولادى.
«بۇنداعى ارتىقشىلىقتار كەلەسىدەي: ازاماتتاردىڭ جەكە دەرەكتەرىنىڭ قورعالۋىنىڭ كۇشەيۋى؛ ءوز بەتىنشە الىناتىن قىزمەتتەر سانىنىڭ ارتۋى؛ قىزمەتتەردى الۋ كەزىندە بوگدە ازاماتتاردىڭ قاتىسۋىن بولدىرماۋ»، - دەدى ا. وسپانوۆ.
باسقارما ءتوراعاسىنىڭ سوزىنە قاراعاندا، ىلكى جوبا 2018-جىلعى 12- جەلتوقسانىنان باستاپ استانا جانە الماتى قالالارىندا ىسكە قوسىلعان.
«ال تولىقتاي بيىل قىركۇيەك ايىندا ىسكە قوسىلادى دەپ جوسپارلانۋدا»، - دەدى ول.
