قازاقتىڭ جىلقى ءتۇسىن سيپاتتايتىن اتاۋلارى گيننەستىڭ رەكوردتارىنا ەنۋى مۇمكىن
بۇل تۋرالى ق ر مادەنيەت جانە سپورت مينيسترلىگىندە وتكەن باسپا ءسوز ءماسليحاتىندا « ۇلىتاۋ» ۇلتتىق تاريحي- مادەني جانە تابيعي مۋزەي- قورىعى ديرەكتورىنىڭ ورىنباسارى بايان شايگوزوۆا ءمالىم ەتتى، دەپ حابارلايدى قازاقپارات ءتىلشىسى.
«قولا ءداۋىرىنىڭ ەجەلگى مەتاللۋرگيالىق قونىس ورنىنا عىلىمي زەرتتەۋ جۇمىستارى جۇرگىزىلدى. بيىل بۇل جۇمىستار، ارينە، جالعاسىن تابادى. سودان كەيىن «جىلقى ءتۇسىنىڭ، قازاق اتاۋلارىنىڭ ەتنونيمى» دەگەن ەتنوگرافيالىق سالادا ۇلكەن عىلىمي جۇمىس جاسالۋدا. ماسەلەن، ەۋروپادا جىلقى ءتۇسىنىڭ 60 اتاۋى، رەسەيدە 40 اتاۋى بولسا، ءبىزدىڭ قازاقستاندا 300 دەن استام ءتۇس اتاۋى بار ەكەن. ءبىز كەلەشەكتە وسى عىلىمي جوبانى گيننەس رەكوردتار كىتابىنا ەنگىزۋ ماقساتىندا ۇلكەن جۇمىستار جۇرگىزىپ كەلەمىز» ، - دەدى بايان شايگوزوۆا.
ەسكە سالا كەتسەك، بايان شايگوزوۆا ۇلىتاۋعا بىلتىر 14 مىڭنان استام تۋريست كەلىپ، تاريحي ەسكەرتكىشتەر مەن كيەلى وڭىرلەردى ارالاپ قايتقانىن ءمالىم ەتكەن بولاتىن.
«ەكسپوزيتسيا جانە ەكسكۋرسيا تۋرالى ايتار بولساق، بىلتىر ۇلىتاۋعا ەكسكۋرسياعا 14 مىڭنان استام تۋريست كەلىپ كەتتى. ونىڭ 200 دەن استامى - شەتەلدىكتەر. تۋريستەردىڭ ءبارى ءبىزدىڭ وڭىرگە كەلگەننەن كەيىن تاريحي وڭىرلەرگە بارادى. قىسىمىز قاتال، كليماتىمىز سۋىق بولعاندىقتان، ماۋسىمدىق جۇمىستار بىزدە مامىر ايىنان باستالىپ، قىركۇيەكتە اياقتالادى. الايدا قىستا دا ەكسكۋرسياعا كەلەتىندەر بارشىلىق» ، - دەيدى ول.
